Avokati i Popullit ka paditur Këshillin e Emërimeve në Drejtësi (KED) mbi mënyrën se si ka vepruar për listat e vakancave për në Gjykatën Kushtetuese dhe për Inspektor të Lartë të Drejtësisë, një çështje që përfshiu në konflikt të ashpër institucional, Presidentin e Republikës, Ilir Meta dhe kreun e KED, Ardian Dvorani.
Konkretisht, objekti i padisë është shfuqizimi i neneve të caktuara në disa vendime të KED-së, që lidhen me procedurat e shqyrtimit, diskutimit dhe dërgimit të listave drejt institucioneve të emërtesës për vendet vakante në Kushtetuese dhe për postin e Inspektorit të Lartë të Drejtësisë.
Gjykata Administrative e Apelit ka njoftuar se e ka regjistruar çështjen dhe shorti për shqyrtimin e saj ka përzgjedhur gjyqtaren Enkelejda Softa Metaliaj./Opinion.al
