Rastësi apo strategji? Vështirë të thuhet. E po kaq e panevojshme të nxjerrësh teori konspirative. Megjithatë ka një përkim interesant të ditës në të cilën Saimir Tahiri dhe Fatmir Xhafaj njoftuan dorëheqjet.
E shtuna, ka rezultuar e pafat për të dy ish-Ministrat e Brendshëm të Edi Ramës, të cilët në fakt jetuan karriera mjaft të përfolura në krye të njërës prej ministrive më të rëndësishme në vend.
Në fillim Tahiri. I konsideruar krahu i djathtë i Edi Ramës dhe cilësuar prej tij si një prej ministrave të suksesshëm të kabinetit. Saimir Tahiri pati një largim aspak dinjitoz e të përfolur, shoqëruar me një histori përgjimesh e gjykatash, që vijojnë edhe sot.
Pasi opozita kishte hedhur akuza direkte për përfshirje të tij në marrëdhënie me organizata kriminale dhe pasi mediat ndërkombëtare kishin shkruar gjatë për Shqipërinë që “lulëzonte” nga plantacionet e kanabisit, të shtunën e 11 Marsit 2017, Saimir Tahiri vendosi të dorëhiqet. Ose u detyrua. Lajmi u konfirmua nga vetë Tahiri. Me pare ai kishte qenë në zyrën e Edi Ramës. Ndërkohe në media kishte nisur të flitej mbi këtë fakt, pak para se informacioni të zyrtarizohej.
***
Mëngjesin e së shtunës së 27 Tetorit 2018, Edi Rama njoftoi përmes tuiterit pranimin e dorëheqjes së Ministrit të Brendshëm Fatmir Xhafaj.
Ashtu si Tahiri (të cilin e zëvendësoi pas largimit), edhe Xhafaj u përfol nga opozita. Ai u diskutua për lidhje me krimin përmes vëllait të tij Agron Xhafaj, që rezultonte ish-i dënuar nga gjykata italiane.
Në fakt opozita prej kohësh kishte kërkuar dorëheqjen e ministrit Xhafaj. Kjo edhe për shkak të funksioneve të tij gjatë regjimit komunist. Por duket se dorëheqja e Xhafës vjen në një moment, kur askush nuk e priste.
Teksa kishte ndërmarrë një sërë aksionesh të zhurmshme dhe kishte arrestuar 34 persona brenda një nate, dorëheqja e Xhafës erdhi si “surprizë” të cilës ende nuk i dihet arsyeja, ndërsa duket se shumë shpejt Kryeministri i kishte gjetur edhe zëvendësuesin./ Opinion.al – Manjola Bregasi
