Emri i Klement i Balilit, i cilësuar ndryshe si “Eskobari i Ballkanit” u bë veçanërisht i njohur në opinionin publik në maj të vitit 2016, kur në drejtim të tij nga Greqia u lëshua një urdhër arresti ndërkombëtar.
Ish-drejtori i Transporteve në Sarandë, dyshohej se drejtonte një grup të trafikimit të drogërave të forta nga Shqipëria në vende të tjera të Europës, fakt ky i vënë në dukje pas një hetimi të shtetit grek dhe Dea-s amerikane.
Pas vendimit gjyqësor të datës 09.12.2016 të Gjykatës së Krimeve të Rënda, ‘’Për caktim mase sigurimi’’ per Klement Balilin i dyshuar për kryerje të veprave penale ‘’Trafik i Narkotikëve’’, ‘’Krijim i grupit të strukturuar kriminal’’ dhe “’Kryerjes së veprave penale nga organizata kriminale dhe grupi i strukturuar kriminal”, një sërë operacionesh u kryen nga Policia e Shtetit me qëllim kapjen dhe ndalimin e tij, por pa arritur të finalizohen me sukses.
Emri i Klement Balilit përfshiu gjithashtu edhe akuza për mbështetje nga njëri apo tjetri kah politik, ndërkohë që nga Ambasadori Amerikan Lu ishte cilësuar si një “peshk i madh” që duhej arrestuar.
Më 10 dhjetor të vitit 2016 rreth 200 forca policore kanë kryer kontrolle në banesa dhe ambiente ky dyshohej se mund të fshihej Balili, i akuzuar për trafik droge, krijim të grupit kriminal dhe vepra të tjera kriminale.
Ndërkohë, operacioni i parë i ndërmarrë për kapjen e Klement Balilit dështoi me dyshimet e dekonspirimit pak muaj pasi ai u shpall në kërkim. Uniformat blu kishin marrë informacion se një mbrëmje Balili do të kalonte me një automjet në Qafën e Gjashtës, në hyrje të qytetit të Sarandës. Për kapjen e tij, u nis nga Tirana një grup i forcave të posaçme operacionale të Drejtorisë së Përgjithshme të Policisë, duke shmangur përfshirjen e policisë lokale. Megjithatë policia nuk gjeti asnjë gjurmë të Balilit.
“Nuk ka pasur aftësi apo vullnet për ta arrestuar vetë Balilin”, deklaronte atëherë ish-ambasadori Donald Lu. Ambasadori amerikan deklaronte se Balili fshihej në Shqipëri, por asnjë operacion i policisë nuk çoi në arrestimin e tij.
Në janar të vitit 2017 Policia e Shtetit ndërmori një tjetër operacion kërkimi për arrestimin e Klement Balilit. Plot 10 banesa, mes tyre dhe ajo e Klement Balilit dhe tre hotele u kontrolluan ndërsa në polici u shoqëruan 11 shtetas mes tyre dhe djali i tij, Jeton Balili. Megjithatë, vetë i dyshuari nuk shfaqej askund.
Në tetor të vitit 2018, një informacion i marrë në rrugë operative se Kelmend Balili ndodhej në Shkodër, vuri në lëvizje forcat speciale të cilat u nisën nga Tirana drejt qytetit të veriut. Rreth 30 trupa nga më të përzgjedhurit të mbështetur nga Policia e Shkodrës, kontrolluan disa lokale në qendër dhe një hotel luksoz. Por nga operacioni nuk pati asnjë rezultat.
Tentativa të tjera për lokalizimin e tij u bënë vazhdimisht, por sërish ish drejtori i transporteve në Sarandë, i hetuar nga DEA amerikane, nuk u gjet asnjëherë. Edhe gjatë bastisjeve të disa banesave ku dyshohej se fshihej, policia nuk gjeti asnjë gjurmë të tij.
Në nëntor të vitit 2017, policia dhe gjykata vendosën në sekuestro resortin “Santa Quaranta” në pronësi të familjes Balili. Policia kreu kontroll me shpresën se do të gjente aty edhe të shumkërkuarin, por pa arritur të identifikojë ndonjë gjurmë.
Në më shumë se 1 vit kërkime dhe operacione, Klement Balili arriti të shpëtojë nga 16 operacione policore për kapjen e tij, por krejt qetësisht, në një moment kur dukej se askush nuk e priste, ai u dorëzua paraditen e 15 Janarit 2015, nën shoqërinë e avokatit të tij mbrojtës pranë policisë, pikërisht kur Prokuroria e Krimeve të Rënda sapo kishte dorëzuar dosjen hetimore në gjykatë për të paktën 4 vepra penale, më të rëndat e të cilave “trafik ndërkombëtar droge” dhe “krijim e pjesëmarrje në një grup të strukturuar kriminal”. / Opinion.al (E.M)
