Deputeti i PS-së, Bashkim Fino është ndarë nga jeta në moshën 59-vjeçare, pasi humbi betejën me Covid-19. Menjëherë pas lajmit kanë qenë të shumta mesazhet ngushëlluese nga kolegët tij.
Presidenti, Ilir Meta, përmes një postimi në rrjetet sociale thotë se kjo ngjarje i ka tronditur të gjithë teksa i shpreh ngushëllime familjes.
“Ndarja e papritur nga jeta e mikut, kolegut, politikanit të moderuar dhe e Kryeministrit të Pajtimit Kombëtar në vitin e vështirë 1997, qytetarit aktiv e familjarit shembullor, Bashkim Fino, na ka tronditur të gjithëve këtë mëngjes. Dhimbje e madhe, që na ka lënë pa fjalë! Ngushëllimet më të ndjera, të prehet në paqe dhe përherë i paharruar në kujtimet tona”, shkruan Meta.
Kryeministri Rama shkroi se sot për PS-në është një ditë zie, duke njoftuar se aktivitetet elektorale do të ndalen, në nderim e kujtim të deputetit socialist.
“E pabesueshme, po shumë fatkeqësisht e vërtetë, miku im, miku ynë i mirë Bashkim Fino nuk jeton më! Nuk kam fjalë. Sot për familjen tonë të madhe është një ditë zie, aktivitetet tona elektorale do të ndalen, në nderim e kujtim të vëllait tonë të dashur”, shkruan Rama.
Kreu i Bashkisë së Tiranës, Erion Veliaj tha se Bashkin Fino ishte një socialist i çmuar.
“Mëngjes fort i trishtë ky, pas ikjes së një burri babaxhan e të mirë, një socialist i çmuar, si Bashkim Fino. Shqiptarët nuk do ta harrojnë kurrë që, në një nga çastet më të vështira të vendit, ai u gjend aty, me urtësinë e tij! Prehu në paqe mik i dashur”, shkruan Erion Veliaj.
Mimi Kodheli teksa publikoi një foto me Finon kur ishin të rinj i shprehu ngushëllimet familjes.
“Ja ku jemi të dy, shokë të një klase fakulteti. Mbetëm deri sot të tillë, por jam e sigurt do takohemi sërish. Lamtumirë shok i kohërave të vjetra e moderne, mik i ditëve të mira e të vështira, Bashkim Fino. Do na mungosh të gjithëve, por më shumë Dianës së dashur. Lamtumirë e shihemi në kohë më të mira!”, shkruan Kodheli.
Edhe ish-presidenri Bujar Nishani reagoi për ndarjen nga jeta të Bashkim Finos.
“Ngushëllimet më të ndjera familjes, të arfërmve dhe miqve të ish Kryeministrit Bashkim Fino ! Pavarësisht pozicioneve dhe projekteve të ndryshme politike që i përkasim, vlera njerëzore dhe dimensioni i dëshirës për të kontribuar për shtetin, për vendin, për Shqipërinë tonë, janë parimet më sublime. Kur këto parime humbasin dikë, të gjithë ndihemi të pikëlluar. Pusho në paqe tashmë, Bashkim!”, shkruan Nishani./Opinion.al
