Deputet e Partisë Socialiste në Tiranë, Etilda Gjonaj dhe Blerina Gjylameti gjatë fjalës së tyre në Kuvend kanë komentuar rastin e arrestimit të kryetarit të Bashkisë së Tiranës, Erion Veliaj.
Gjonaj tha për të cilin tha se ndalimi i tij tre muaj para zgjedhjeve është krejtësisht e padrejtë.
“Ndjej keqardhjen e madhe që Erion Veliaj dhe familja e tij, gjenden në këtë situatë sot. Nga një anë mes një përbaltjeje dhe njollosje të dinjitetit të figurës së tij dhe të familjes së tij në mënyrë të padrejtë dhe të padenjë. Dhe nga ana tjetër me një betejë që duhet të bëjë me drejtësinë për të vërtetën e tij. Si deputete e Tiranës, ashtu si edhe shumë kolegë të mitë, mendoj se burgosja e kryetarit të Bashkisë së kryeqytetit dhe lënia e qytetarëve të Tiranës pa kryetarin e tyre të zgjedhur me votën e qytetarëve, 3 muaj para zgjedhjeve, kur është ende person nën hetim është e padrejtë.
Masa e sigurisë arrest me burg, s’mund të jetë në disproporcionalitet me atë që është në të mirën publike dhe që prish balancat e kryeqytetit normal. Të një kryeqyteti që duhet të ofrojë me mijëra shërbime ditore për qytetarët e tij. S’mund të jetë në disproporcionalitet me të mirën dhe interesin më të lartë të një fëmije, që ta vendosë në kushtet për të mos patur përkujdesjen e një prindi.
Kam qenë gjithmonë edhe si njeri i fushës, për një politikë penale që nuk i shërben vetëm për represion dhe nuk më bëhet qejfi për askënd që arrestohet, por ka ardhur koha që të ndërtojmë të gjithë bashkë, një politikë penale që i shërben në radhë të parë një shoqërie të shëndetshme”, nënvizoi ish-ministrja e Drejtësisë.
“Në një shtet demokratik, në shtet ligjor, në shtet të së drejtës çdo njeriu i prezumohet pafajësia deri në momentin që vërtetohet e kundërta. Nëse sot për Erionin flasim, jo vetëm si një mik se është një mik shumë i mirë, i imi, i çdo socialisti dhe si deputete e Tiranës e them me gojën plot që nuk është gjëja e duhur të ndërpresësh kontratën e një kryetari të Bashkisë në mes të lojës, pa pasur një proces dhe pa marrë formën e prerë të vendimit që është i fajshëm”, deklaroi Gjylameti.
Ajo theksoi se nuk është çështja e mbrojtjes së një individi, por respektimit të standardeve të drejtësisë për të gjithë.
“Duhet të zbatohen standarde, si për Erionin dhe për çdokënd, por nuk mund të ndërpritet një kontratë në mes, sepse në fund të ditës është i votuar, i zgjedhur dhe ka disa standarde të drejtësisë që duhet të zbatohen. Ka disa procedura që duhet të zbatohen”, shtoi deputetja socialiste.
