Pasi presidenti amerikan, Donald Trump nënshkroi një urdhër ekzekutiv që autorizon tarifat 25% për makinat dhe pjesët e makinave të importuara në SHBA, liderët nga vendet e huaja që mund të goditen më shumë nga taksat ndanë kritika të ashpra publike.
Ja çfarë kanë thënë liderët dhe zyrtarët e shteteve që do preken nga tarifat e Trump”
Kanadaja
Kryeministri Mark Carney tha se tarifat ishin një “sulm i drejtpërdrejtë” në shkelje të Marrëveshjes SHBA-Meksikë-Kanada dhe se Otava do të shqyrtonte opsionet e saj për një përgjigje, duke përfshirë tarifat e mundshme hakmarrëse. Komiteti i Kabinetit të Kanadasë për Marrëdhëniet Kanada-SHBA mbajti një takim këtë mëngjes për të diskutuar opsionet.
Meksika
Presidentja meksikane Claudia Sheinbaum tha se do të ofronte një “përgjigje gjithëpërfshirëse” ndaj tarifave më 3 prill, por sinjalizoi se qeveria e saj po punon në prapaskenë për të hequr ose ulur tarifat për disa automjete dhe pjesë të montuara në Meksikë.
Japonia
Kryeministri japonez, Shigeru Ishiba tha se Tokio do të shqyrtojë “të gjitha opsionet” në përgjigje të tarifave.
“Ne po kërkojmë me forcë që ky 25% të mos zbatohet në Japoni. Japonia investon në Shtetet e Bashkuara, duke krijuar vende pune dhe duke paguar pagat më të larta”, tha Ishiba.
Koreja e Jugut
Kompanitë e automjeteve pritet të përjetojnë vështirësi të konsiderueshme për shkak të tarifave për makinat dhe pjesët e automjeteve, tha ministri i tregtisë Ahn Duk-geun. Ahn mbajti një takim emergjent me përfaqësues nga kompanitë automobilistike, shoqatat e industrisë dhe institucionet kërkimore për të diskutuar tarifat.
Të martën, Hyundai u zotua të investojë 21 miliardë dollarë në SHBA gjatë tre viteve të ardhshme. Investimi do të fokusohet në zgjerimin e aftësive të tij prodhuese.
Komisioni Evropian
Presidentja e Komisionit Europian, Ursula von der Leyen tha se tarifat do të dëmtonin amerikanët, megjithëse ajo nuk premtoi hakmarrje. BE ka njoftuar tarifa hakmarrëse në përgjigje të tarifave të çelikut dhe aluminit që Trump vendosi këtë muaj, por i shtyu ato me shpresën e arritjes së një marrëveshjeje.
Kina
Ndryshe nga rivalët e saj aziatikë, industria e makinave në Kinë është kryesisht e izoluar nga ky raund tarifash. Administrata Biden rriti tarifat për automjetet elektrike kineze në 100%, gjë që i ka nxjerrë ata nga tregu. Megjithatë, zëdhënësi i ministrisë së jashtme, Guo Jiakun akuzoi SHBA-në për shkelje të rregullave të Organizatës Botërore të Tregtisë duke vendosur tarifat e automjeteve.
Mbretëria e Bashkuar
“MB nuk po planifikon tarifa hakmarrëse për importet e makinave nga SHBA për momentin”, tha kancelarja e Mbretërisë së Bashkuar Rachel Reeves. SHBA është tregu i dytë më i madh për eksportet e makinave në Mbretërinë e Bashkuar pas Bashkimit Europian, sipas të dhënave nga Shoqata e Prodhuesve dhe Tregtarëve të Motorëve.
