Ministri për Evropën dhe Punët e Jashtme, Igli Hasani ndodhet këtë të hënë në një vizitë zyrtare në Itali ku do të marrë pjesë në takimin e ministrave të Jashtëm të Ballkanit Perëndimor, i organizuar nga zv.kryeministri dhe njëkohësisht ministri i Jashtëm italian Antonio Tajani.
Agjenda e Hasanit për ditën e sotme, 5 shkurt:
– Ora 11:00 – Ministri Hasani do të zhvillojë një takim me Presidentin e Komisionit për Politikat e Bashkimit Evropian, Giulio Terzi di Sant’Agata.
– Ora 16:30 – Takim i Ministrave të Jashtëm të grupit “Miqtë e Ballkanit Perëndimor” dhe MPJ-ve të Ballkanit Perëndimor, me ftesë të zv.Kryeministrit dhe Ministrit të Punëve të Jashtme dhe Bashkëpunimit Ndërkombëtar të Italisë, Antonio Tajani.
Ndërsa ditën e nesërme (6 shkurt) në orën 10:00, Shqipëria dhe Italia pritet të firmosin marrëveshjen për njohjen reciproke të kontributit për sigurimet shoqërore.
Marrëveshja vjen si një detyrim dhe e drejtë ndaj qytetarëve shqiptarë, italianë dhe italo-shqiptarë, të cilët kanë punuar dhe kanë kontribuar në ekonominë dhe përparimin social të dy vendeve.
Pas firmosjes së marrëveshjes, 2 ministrat e Jashtëm do të mbajnë edhe një konferencë për mediat.
