Presidenti i Turqisë, Recep Tayyip Erdogan është shprehur se do të vijojë operacionin ushtarak në verilindje të Sirisë “me vendosmëri edhe më të madhe”, nëse luftëtarët kurdë dështojnë në respektimin e marrëveshjes për armëpushimin e ndërmjetësuar nga Shtetet e Bashkuara.
Këto deklarata Ergodan i ka bërë përpara nisjes drejt Rusisë, ku theksoi se të gjitha forcat policore kurde duhet të largohen nga zona e sigurt që Turqia dëshiron ta krijojë përgjatë një pjese të kufirit të saj me Sirinë.
Erdogan u shpreh se rreth 700 deri në 800 luftëtarë kurdë tashmë janë larguar, ndërsa mbeten ende 1,200 deri në 1,300 të tjerë pa u larguar.
“Institucionet tona po e monitorojnë nga afër situatën në terren. Nëse premtimet që ka dhënë Amerika nuk mbahen, ne do ta vazhdojmë operacionin aty ku e kemi lënë, këtë herë, me vendosmëri edhe më të madhe”,– tha Presidenti turk, Erdogan.
Më 9 tetor, Turqia ka nisur një operacion kundër forcave kurde në verilindje të Sirisë, duke thënë se dëshiron të pastrojë kufirin e saj nga “terroristët”.
Në këtë ofensivë, qindra civilë janë vrarë dhe të tjerë janë plagosur.
Pas tetë ditësh, me këmbënguljen e SHBA-së, Turqia ra dakord për një armëpushim 5 ditor, për t’iu mundësuar kurdëve të largohen rreth 30 kilometra larg kufirit.
Ndërkohë Erdogan pritet të takojë në Rusi presidentin e këtij vendi, Vladimir Putin.
Sipas Kremlinit takimi i tyre do të përqendrohet në luftën e Sirisë./Opinion.al/
