Pas humbjes së vajzës Rebeka si pasojë e një sëmundjeje, nëna e saj Xheraldina, ka humbur motivin për të jetuar. Vajza tjetër e saj, Debora përpiqet ta motivojë nënën për t’ju rikthyer jetës, në emër edhe të Rebekës që nuk jeton. Ka qenë Debora, që e ka thirrur të ëmën në programin “Dua të bëj të lumtur”.
Ajo i kërkoi Xheraldinës që të jetonte për Rebekën, për të dhe për veten dhe i premtoi se së bashku do t’ia dilnin mbanë. “Nënë fshiji lotët, mos qaj dhe pse nuk e kemi Rebekën ne duhet të jemi të forta”, – ishin këto fjalët me të cilat Debora iu drejtua nënës së saj, fjalë të cilat përlotën Xheraldinën dhe publikun që ndodhej në studio.
Për ta mbështetur Deborën në mesazhin e saj, Arbana kishte ftuar artistin që i kishte mbështetur në rrugëtimin e tyre, Ledri Vulën.
Ledri është një ndër artistët që i ka qëndruar më pranë Rebekës, duke u përfshirë në fushatën sensibilizuese për të mbledhur të ardhura për kurimin e saj.
Gjatë momentit që po bisedonte me Xheraldinën, Ledri shpërtheu në lot kur tregoi se gjatë xhirimit të klipit “Beautiful” në bashkëpunim me Flori Mumajesin, e kishin kujtuar shpesh herë Rebekën dhe luftën e saj e madje kishin lotuar edhe gjatë regjistrimeve.
Ndër të tjera, Ledri u shpreh se: “Nëna është shtylla e familjes dhe nëse nëna bie, krejt bien”. Madje ai i premtoi publikisht Xheraldinës që do ta ndihmonte të ndryshonte jetën duke i gjetur një punë.
