Prokuroria e Tiranës po heton një skemë të pastrimit të parave, ku është i përfshirë Arben Lika, ish – Deputet i Kuvendit të Shqipërisë. Hetimi po kryehet nga Njësia Task – Forcë e Prokurorisë së Tiranës, pas referimit të bërë nga Policia e Shtetit. Lika dyshohet se mes manovrare të ndryshme, duke ngritur kompani fiktive, ka pastruar mijëra euro.
Por gjatë hetimit të zhvilluar nga Prokuroria, për transfertat e kryera nga kompania e personit nën hetim, Lika ka kryer një transfertë të pajustifikuar, në vlerën e 1 milionë eurove.
Kjo shumë parash është hedhur në llogarinë e Likës nga kompania “Heanye Assets Corporation”. Kjo firmë është e njohur në vendin tonë pasi ka blerë rafinerinë e naftës në Ballsh dhe e shfrytëzon atë prej disa vitesh.
Lika është marrë në pyetje nga Prokuroria për këtë shumë parash, se përse ka kaluar në llogarinë e tij dhe për mënyrën se si e ka tërhequr. Ai është përgjigjur se ka nënshkruar për tërheqjen e shumës, por thotë se, ai vetë nuk i ka tërhequr, pasi paratë janë marrë nga persona të tjerë të panjohur për të.
Në këto rrethana, Prokuroria thotë se është përballë veprës penale të pastrimit të parave. Sipas Prokurorisë, kompania e ngritur nga ish – Deputeti nuk ka paguar asnjë detyrim dhe nuk deklaruar shumën e përfituar nga kompania që zotëron rafinerinë e Ballshit.
