Kryeministri holandez, Mark Rute tha pas një takimi me kancelaren Anglea Merkel se është i shqetësuar për mungesën e përparimit të Shqipërisë.
Sipas kreut të qeverisë holandeze, Shkupi ka bërë më shumë progres se Tirana por gjithsesi ai tha se diskutimet vazhdojnë.
“Sa i përket Shqipërisë dhe Maqedonisë së Veriut, ne jemi akoma të shqetësuar, së bashku me disa shtetet të tjera, më pak për Maqedoninë e Veriut dhe më shumë për Shqipërinë. Ne po pyesim veten se sa progres ka bërë Shqipëria? Ne do ta adresojmë këtë çështje javët në vijim me partnerët tanë europiane. Por ne jemi shumë të shqetësuar për mungesën e progresit. Maqedonia e Veriut ka bërë më shumë se Shqipëria, por diskutimet vazhdojnë”, deklaroi kryeministri holandez.
Qëndrimi i Holandës në lidhje me çeljen e negociatave për anëtarësim me Shqipërinë vazhdon të mbetet skeptik. Disa ditë më parë, ministri i jashtëm holandez Stef Blok, gjatë raportimit në komisionin parlamentar për çështjet evropiane theksoi se Tirana jo vetëm nuk ka realizuar kushtet e vëna nga Këshilli evropian por ka bërë hapa prapa.
Parlamenti holandez ka vendosur një mocion ndaj qeverisë për të mos hapur negociatat me Shqipërinë. Gjithsesi ajo mund ta anashkalojë atë por kjo do ti kushtonte besimin në Senat ku partitë qeverisëse janë në minorancë ndërsa shumica është pjesë e bllokut që kanë propozuar mocionin./Opinion.al
