Ka përfunduar pa marrëveshje takimi “kokë më kokë” mes kryeministrit Edi Rama dhe kreut të opozitës Lulzim Basha, i zhvilluar në Presidencë.
Takimi që nisi në orën 19:00 të pasditës dhe që zgjati rreth 2 orë, u thirr nga Presidenti Bujar Nishani me qëllim gjetjen e dialogut për zgjidhjen e krizës politike në vend.
I pari që doli nga Presidenca ishte Kryeministri Edi Rama, i cili deklaroi përpara gazetarëve se jemi në të njëjtin pozicion që kemi qenë dje.
“Oferta që unë i kam bërë PD-së nëpërmjet kryetarit të saj është ajo e ditura, për të ndërtuar një mekanizëm monitorimi të zgjedhjeve. Për sa i përket kërkesës këmbëngulëse të PD-së për numërim dhe votim elektronik, kam propozuar që një ministër i Partisë Demokratike të bëhet pjesë e qeverisë për të përgatitur një projekt të besueshëm. Nëse certifikohen si të besueshme, atëherë t’i zbatojmë në zgjedhjet e ardhshme.
Për sa i përket datës së zgjedhjeve, data e zgjedhjeve është më 18. Jemi në limitet e fundit të kohës. Përpjekja për të bërë gjithçka që na takon si qeveri për të garantuar PD-në për aq sa na takojnë rregullat e lojës, nuk kanë shteruar. Dua ta përsëris se një ofertë tjetër nuk e kemi dhe nuk do ta kemi”, tha Rama.
Rreth 10 minuta më vonë nga zyra e kreut të shtetit doli edhe kreu i opozitës, Lulzim Basha. Në një prononcim përpara gazetarëve, Basha theksoi se kryeministri Rama erdhi në takim pa një ofertë të re.
Sipas tij, takimi i sotëm me Ramën ishte një kopje e takimit të djeshëm. Ai deklaroi se pala tjetër nuk pranon që të dorëzojë kriminelët me pushtet, të cilët vazhdojnë të mbajnë pushtetin e tyre.
Me ftesë zyrtare, Presidenti Nishani ka lajmëruar se tryeza mes palëve politike do të zhvillohet këtë të enjte në orën 19:00 në Presidencë.
Nishani i kërkoi Kryeministrit të vendit dhe liderit të opozitës uljen në tryezën e bisedimeve me vullnetin për kompromis, për të tejkaluar këtë situatë të vështirë për vendin.
Për këtë Presidenti ofroi angazhimin e tij institucional në shërbim të dialogut. Të dyja palët u shprehën të gatshme për këtë tryezë dialogu.
Ky është takimi i dytë brenda 48 orësh mes tyre në përpjekje për të negociuar zgjidhjen e krizës politike në vend.
