Trafikantët shqiptarë të drogës kanë ngritur piramidat e tyre familjare dhe mafioze.
Në mungesë të kapjes së “Eskobarit të parë”, në Turqi sot u kap “Eskobari i dytë”. Nesër mund të kapen të tjerë dhe të gjithë do të kenë një numër hierarkik. P.sh, i ‘Dytë’, i ‘Tretë’ dhe i ‘Katërt’- si të thuash në rangje ‘Sulltan Mehmeti i Tretë’.
Sot në Turqi është kapur Met Kanani, i cili menjëherë është ëmërtuar nga media turke si ‘Eskobar shqiptar’.
“Haberturk” shkruan se Eskobari shqiptar u kap sot në Turqi me 1.1 tonë kanabis, në vlerën 5.2 milionë euro.
Grupi i trafikantëve shqiptarë përbëhet nga 11 persona.
Ai është vënë në përgjim që gjashtë muaj më parë, që përdorte brigjet e detit për të shkarkuar drogën.
Grupi i 11 trafikantëve me Met Kananin u kap në brigjet e Bodrumit.
Mbërritjen e drogës e pa nga maja e një kodre
Me mbërritjen e Met Kananit në Bodrum, policia nisi ndjekjen e tij nga afër. Gjatë hetimeve u pa se Met Kanani po shikonte mbërritjen e drogës me një jaht në brigjet e Mulas, nga maja e një kodre. Por ‘baroni’ shqiptar nuk e dinte se po ndiqej nga policia, e cila edhe e kishte fotografuar.
Banda e tij përdorte si depo një adresë në Milas të Mulas, e cila përdorej edhe për magazinimin e ujit. Më të provuar vend-magazinimin e drogës, policia vendosi të niste operacionin për arrestimin e trafikantëve.
Mediat turke theksojnë se policia e bastisi depon në orën 02:30 të mëngjesit të së martës. Në depo u arrestua “Met shqiptari” dhe 6 njerëz të tij, si dhe u sekuestruan 1.1 ton kanabis me vlerë mbi 5 milionë euro. Ndërsa në valën e dytë të operacionit të zhvilluar të enjten me pjesëmarrjen e 250 policëve u arrestuan edhe 4 të tjerë.
“Hurriyet” dhe “Yeni Safak” raportojnë se 4 prej të arrestuarve ishin shqiptarë, ndërsa kombësia e 7 trafikantëve të tjerë nuk bëhet e ditur. Sipas informacioneve të policisë turke, kanabisi do të bëhej gati për treg dhe do të transportohej drejt Stambollit për shitje.
Operacioni në Greqi
“Hurriyet” raporton se ndaj Met Kananit, më 29 Nëntor të vitit të shkuar kishte kryer një operacion edhe policia greke.
Në operacionin gjatë të cilit u përdorën edhe helikopterët, për ndjekjen e gomones me kanabis nga ajri, pati shkëmbim zjarri mes trafikantëve dhe policisë. Pasi u mbaroi benzina, trafikantët u dorëzuan dhe policia greke sekuestroi 1.3 tonë kanabis, megjithatë grekët nuk arritën të kapin ‘kokën’ e grupit, Met Kananin.
Kanani raportohet se kishte në duart e tij një pjesë të rëndësishme të rrugës ballkanike të trafikimit të drogës. Sipas ekspertëve, nëpërmjet kësaj rruge, banda e tij dërgonte në Europë heroinën që vjen nga Afganistani, Irani dhe Turqia, teksa nga Europa merrte kanabis dhe pilula droge, të cilat i trafikonte kryesisht për në vendet arabe.
Me këtë operacion, media turke raporton se është goditur rëndë rruga ballkanike e trafikimit të drogës, si dhe e kanabisit që prodhohet në Shqipëri.
