Kreu i Partisë së Lirisë, Ilir Meta, në një konferencë për mediat këtë të martë iu përgjigj pyetjes së gazetarëve nëse duhet të tërhiqet nga politika për shkak se në sondazhet e zhvilluara nga një televizion ai rezultonte ndër liderët më pak të pëlqyer.
Meta tha se sondazhet janë të kombinuara nga ata që financohen nga paratë e inceneratorëve dhe se këtë sondazh e ka shpallur Edi Rama.
Sipas tij Rama e ka sulmuar që ditën që la Presidencën, ndërsa thekson se i beson sondazhit të përditshëm që bën në raport me qytetarët dhe atij të zgjedhjeve vendore.
“Këto sondazhe janë të kombinuara edhe nga ata që financohen nga paratë e inceneratorëve këtë sondazh e ka shpallur Edi Rama që ditën që kam dalë nga presidenca. Rama e di shumë mirë që mbi 80% e Shqipërisë po zien nga padurimi që ta shporrë atë. Ai e di shumë mirë që nëse ka një forcë politike ku duart e tij priten shumë shpejt është Partia e Lirisë, se te të tjerat i ka futur duart. Parulla që të ikin këta, të vijnë të rinj si Veliaj dihet që vjen nga inceneratorët. Unë i besoj sondazhit të përditshëm që bëj në raport me qytetarët dhe atij të zgjedhjeve vendore ku Partia e Lirisë do të arrijë një rezultat të jashtëzakonshëm dhe do të japë kontribut të fitores së gjithë opozitës në rast se opozita e dëshiron këtë fitore. Nuk jam i shqetësuar për popullaritetin tim por për gjendje e rënduar vendit që vjen si rezultat i Ramës”-tha Meta.
