Ish-ministri i Drejtësisë, Ylli Manjani ka reaguar për vendimin e marrë në mbledhjen e fundit të qeverisë për ndërtimin e varrezave greke në Korçë.
“Në mes të mjergullës së puçit Kushtetues, kryeujku vendosi të ndërtojë varrezat greke në Korçë!”, shkruan ai duke ironizuar se: “Ashtu si në Kosinë, pritet që të ketë një “boom” ekonomik nga tregëtia e kockave edhe atje… Mirë politikanë, po a ka historianë analistë e qytetarë ky vend apo jo?! Asnjë sflet më!”.
Lidhur me ndërtimin e varrezave greke ka pak informacion nga qeveria shqiptare, ndërsa vendimi është mirëpritur në Greqi. Ministri i Jashtëm, Nikos Kotzias e ka quajtur një hap shumë pozitiv, duke theksuar se përpos varrezave, qeveria shqiptare do ndërtojë me fondet e saj edhe kishën e vogël të Shën Athanasit, e cila u shkatërrua vitin e kaluar në Dhërmi.
I pyetur sesi e komenton vendimin e qeverisë shqiptare për varrezat greke, Kotzias ka deklaruar: “Mendoj se ligji zbatues i miratuar nga Këshilli i Ministrave të Shqipërisë me anë të të cilit zgjidhen çështjet e varrezave të ushtarëve dhe oficerëve grekë që ranë në luften italo-greke, është një hap i madh për atë që ne e themi në mënyrë popullore ‘qetësimin e shpirtit të të rënëve’, por është gjithashtu një hap besimi mes dy vendeve tona”.
Kujtojmë se në mbledhjen e saj të fundit më datë 13 dhjetor, Qeveria shqiptare ka miratuar vendimin për ndërtimin e varrezave të reja ushtarakëve grekë, të rënë në Shqipëri gjatë luftës greko-italiane të viteve 1940-1941. Ky ka qenë një nga kushtet kryesore që ka vendosur gati çdo qeveri greke në bisedimet greko-shqiptare. Në vendimin e Këshillit të Ministrave nuk përcaktohet se sa varreza do ndërtohen dhe vendet ku do ndërtohen ato. Sipas VKM-së së publikuar në faqen zyrtare të Qeverisë del se varrezat nuk kufizohen në numër dha as në vendodhje.
Në fund të vendimit thuhet se: “ngarkohen prefektët e qarqeve ku do të zhvillohen punimet për zbatimin e këtij vendimi”, ku flitet në shumës për qarqet haptazi nënkupton që do të jenë disa varreza të shtrira në disa qarqe.
Aktualisht në vendin tonë janë dy varreza të ushtarëve grekë, një në Këlcyrë dhe një fshatin Bularat të Dropullit. Këto varreza janë ndërtuar gjatë mandatit të dytë të Qeverisë Berisha, që i ka përcaktuar me vendim të Këshillit të Ministrave në vitet 2010 e 2012.
Më poshtë VKM-ja e miratuar më 13 Dhjetor 2017
