Organizata Botërore e Shëndetësisë të enjten miratoi në kushte emergjente vaksinën Pfizer-BioNTech, duke hapur rrugën që vendet në mbarë botën të aprovojnë shpejt importin dhe shpërndarjen e saj.
“Ky vendim e bën vaksinën Pfizer / BioNTech të parën që merr aprovim emergjent nga OBSH që nga shpërthimi i Covid një vit më parë,” tha OBSH në një deklaratë.
Britania nisi e para vaksinimin më 8 Dhjetor, e ndjekur nga Shtetet e Bashkuara, Kanadaja dhe vendet e BE-së.
“Ky është një hap shumë pozitiv drejt sigurimit të aksesit global në vaksinat COVID-19”, tha Mariangela Simao, një zyrtare e lartë e OBSH-së e ngarkuar me sigurimin e aksesit në ilaçe.
“Por unë dua të theksoj nevojën për një përpjekje edhe më të madhe globale për të arritur furnizim të mjaftueshëm me vaksina për të përmbushur nevojat e popullatave prioritare kudo,” tha ajo në një deklaratë.
OBSH tha që lista e saj e përdorimit emergjent hap rrugën për rregullatorët në vende të ndryshme për të aprovuar importin dhe shpërndarjen e vaksinës.
OBSH mblodhi ekspertët e vet dhe ata nga e gjithë bota për të rishikuar të dhënat mbi “sigurinë, efikasitetin dhe cilësinë” e vaksinës Pfizer / BioNTech, duke peshuar përfitimet dhe rreziqet.
“Rishikimi zbuloi se vaksina plotësonte kriteret e domosdoshme për sigurinë dhe efikasitetin të përcaktuara nga OBSH, dhe se përfitimet e përdorimit të vaksinës për të adresuar COVID-19 kompensojnë rreziqet e mundshme”, tha ekspertja e OBSH./Opinion.al
