Një 26-vjeçar është arrestuar nga policia e Tiranës, nën akuzën e vjedhjes në tre qytete.
Shtetasi K.M. ishte shpallur në kërkim nga policia, pasi gjykata e shkallës së parë e kishte dënuar me 6 muaj burg për veprën penale “Vjedhja”.
Ky shtetas ishte shpallur në kërkim gjithashtu dhe drejtoritë e policisë në Durrës dhe Shkodër, për të njëjtën vepër penale.
“Shërbimet e Komisariatit të Policisë Nr. 2, në vijim të masave të përcaktuara në planin operacional “Sundimi i ligjit”, bazuar në informacionet e siguruara nga inteligjenca policore mbi vendndodhjen e një shtetasi në kërkim, kanë organizuar punën për kapjen dhe vënien e tij përpara përgjegjësisë ligjore.
Si rezultat i kontrolleve të ushtruara, u kap shtetasi në kërkim K.M. 26 vjeç, banues në Tiranë.
Ky shtetas ishte shpallur në kërkim nga DVP Tiranë, pasi Gjykata e Shkallës së Parë e Juridiksionit të Përgjithshëm Tiranë e ka dënuar me 6 muaj burgim, për veprën penale “Vjedhja”. Gjithashtu, nga verifikimet e kryera rezultoi se ky shtetas ishte shpallur në kërkim nga DVP Durrës dhe nga DVP Shkodër, për të njëjtën vepër penale”, njofton policia.
Materialet i kaluan Prokurorisë.
