Shënim Nga Dritan Laci
Me të drejtë media e ka cilesuar si “mallkimi i çekëve”. Ky është fati i trishtë i shumë çekëve qe kanë humbur jetën në rrethana misterioze në udhëtimin e tyre nëpër Shqipëri. Ngjarje të cilat nisin në vjeshtën e vitit 2001 ku tre studentë turistë çek, përkatësisht vëllezërit Jan dhe Mihal Pavelka dhe Lenka Tuckova zhduken pa lënë gjurmë në zonën malore të Dukagjinit. Edhe sot kur kanë kaluar 14 vite nga kjo ngjarje, asgjë nuk dihet për fatin e tyre. Ndërkohë që dyshohet se turistët janë vrarë dhe më pas zhdukur në malësitë e Dukagjinit, por kjo mbetet vetem hipotezë. Në korrik të vitit 2011 katër turistë çek, Jakub Rudy, Radka Domcikova, Jan Kraut dhe Tereza Domcikova, ranë pre e grabitjes në luginën e malit të Korabit. Ku katër barinj nën kërcënimin e një arme çifte, pasi u morën sendet personale dhe lidhen meshkujt e grupit tentuan të përdhunojne dy vajzat në sy të djemve. Me 1 qershor 2014, turisti çek David Polack vdes në Dukagjin, pasi makina e tij bie në gremine. Më 15 gusht 2014, turistja çeke, 26 vjecare, Martina Mala, plagoset në një lokal në plazhin e Velipojës. Ndërsa më 8 maj 2015 turisti çek, Adam Baron, 26 vjec, mbytet në ujerat e lumit Kir ndërsa bënte rafting. Ndërkohe që ngjarja më e rëndë është ajo e 4 korrikut 2015, kur dy turistë çek, Mihal Svatos dhe Ana Kosinova, ranë pre e grabitjes në fshatin Prekal të Dukagjinit ku edhe humbën jetën pasi u ekzekutuan nga grabitësi, i njohur si Sokol Mjacaj. Ndërsa ditën e sotme po një turist çek, I cili udhëtonte në malin e Korabit, humbi bashkë me kolegun e tij francez, për tu gjetur vetëm pak orë më pas, fatmirësisht shëndoshë e mirë.
