Në datë 22 korrik, socialistët do të mbledhin Asamblenë e Përgjithshme. Data është vendosur në mbledhjen e sotme të Kryesisë së PS-së që u zhvillua për rreth 1 orë, ndërsa u drejtua nga kryeministri Edi Rama.
Pas zgjedhjeve të 30 Qershorit, Rama deklaroi se pas takimeve dhe analizës në çdo qark do të mbahet edhe Asambleja brenda korrikut për të dalë në konkluzione për atë që ka ndodhur.
“Debat të brendshëm për të analizuar qeverisjen nga korriku dhe për të programuar të tëra korrigjimet e nevojshme në funksion të sfidës tashmë tej mase të vështirësuar. Një debat të gjerë për të analizuar situatën në familjen tonë të madhe duke u mbështetur në shembujt e suksesshëm organizativë që nuk munguan sot. Një debat për të analizuar edhe pozicionin tonë të ri në skenën politike. Ata sot janë aty ku e meritojnë, në gropën ku donin të fusnin Shqipërinë, drejtësinë e qeverinë. Sa kohë do të bëjnë sikur nuk shikojnë, sikur nuk dëgjojë, se jo vetëm e kanë humbur davanë por se as Zoti vetë nuk i shpëton nga rrënimi përfundimtar nëse do ta kërkojnë shkakun e disfatës jashtë tyre”, do të deklaronte Rama.
Po ashtu ditët e fundit është folur për nisjen e një dialogu për të zgjidhur krizës mes mazhorancës dhe opozitës, ndërsa kjo e fundit e ka mohuar këtë gjë./ Opinion.al
