Kryetari i LZHK dhe aletati i Lulzim Bashës në frontin opozitar, Dashamir Shehi ka deklaruar se kreu i opozitës i ka pranuar kushtet e ndryshimit të sistemit zgjedhor. Reforma zgjedhore ka qenë në qendër të diskurimeve mes Bashës dhe zyrtarit të DASH, David Kostelancik dhe sipas Shehit ndryshimet e propozuara për të kufizuar pushtetin e kryetarit të partisë janë pranuar nga Basha.
“Që t’i japë shans njerëzve të zgjedhin përveç flamurit të partisë edhe personalin. T’i rikthejmë politikës dinjitetin. Një Kushtetutë e ndryshuar që të verë rregulla të reja loje. Përzënia nga ambienti i grupeve kriminale që me pushkë në dorë ka mbledhur vota për Edi Ramën”, tha Shehi në një intervistë për ABC News.
“Basha i ka pranuar këto kushte edhe me kondicionin që nuk i shkon fort në favor sepse dorëzon pushtet Basha. Herën e fundit i bëri listat siç desh vetë. Këtë radhë sigurisht që bie ky pushtet”, shtoi ai.
Ndërkaq, kreu i Partisë Republikane, Fatmir Mediu është në një mendje me aletatin e tij dhe thotë se për reformimin e sistemit zgjedhor palët duhet të ulen në tavolinë për të analizuar se kush sistem garanton një përfaqësim më të drejtë.
“Mendoj që opozita duhet të arrijë të propozojë një… mendoj në radhë të parë në gjykim politik dhe pastaj nga pikëpamja teknike dhe ne kemi ide për këtë çështje. Është e domosdoshme që ne të ulemi të analizojmë kush është ai sistem zgjedhor që i garanton qytetarët të kenë përfaqësuesit e tyre në Kuvend, kush është ai administrim i procesit zgjedhor që garanton shmangien e procesit të blerjes së votës, manipulimin e procesit, një administrim i drejtë”, thotë Mediu.
Kreu i republikanëve shton gjithashtu se opozita nuk duhet të anashkalojë Partinë Socialiste si faktor politik i rëndësishëm në vend pavarësisht se në krye të saj është Edi Rama.
“Opozita të shikojë se cilat janë rrugët që duhet të ndjekë me PS-në. Gabimi ynë është që mendojmë gjithnjë se kush është Edi Rama. Ne duhet të mendojmë që ka një faktor politik në vend që është PS dhe nuk mund të jetë faktor politik i paneglizhueshëm pavarësisht se në ç’lloj derexheje e ka katandisur Edi Rama”, shprehet Mediu.
Lulzim Basha foli gjatë javës për një platformë për nxjerrjen e vendit nga kriza. Sipas tij kjo do të jetë një ofetë e opozitës për qytetarët dhe gjiithashtu pritet që në këtë platform ti jepet përgjigje cështjes së dialogut me mazhorancën. /Opinion.al
