Ndryshimet kushtetuese dhe ato në Kodin Zgjedhor do të jenë pjesë e diskutimeve politike nga java e ardhshme kur pritet të mblidhet edhe Këshilli Politik.
Komisioni i Ligjeve do të mblidhet ditën e hënë dhe të iniciojë ndryshimet e nevojshme në Kodin Zgjedhor që imponohen nga ndryshimet kushtetuese të miratuara më 30 korrik. Po në te njejtën ditë, deputeti socialist Damian Gjiknuri ka kërkuar mbledhjen e Këshillit Politik.
“Pas hyrjes së tyre në fuqi, Konferenca e Kryetarëve të Grupeve Parlamentare në Kuvend ka përcaktuar nevojën për reflektimin në Kodin Zgjedhor të këtyre ndryshimeve Kushtetuese. Ditën e Hënë, 14 Shtator, është përcaktuar mbledhja e Komisionit Parlamentar për Çështjet Ligjore ku do të miratohet krijimi i një grupi pune për reflektimin e ndryshimeve Kushtetuese në Kodin Zgjedhor. Në frymën e dialogut të konsoliduar mes palëve në tryezën e Këshillit Politik, me synim arritjen e një konsensusi sa më të gjerë në këtë proces, propozoj thërritjen e tryezës së Këshillit Politik ditën e Hënë, datë 14 shtator, ora 18:00”, thuhet në letrën e dërguar anëtarëve të Këshillit Politik nga ana e përfaqësuesit të Partisë Socialiste, Damian Gjiknuri.
Çështja kryesore për amendimin e Kodit Zgjedhor që do të diskutojë Këshilli pritet të jetë koalicionet parazgjedhore.
Maxhoranca mendon se listat e hapura e pamundësojnë formulën e koalicioneve tradicionale. Ndërsa nga ana tjetër, opozita politike këmbëngul se ndryshimet e bëra në Kushtetutë nuk imponojnë ndryshimin e formulës së shpërndarjes së mandateve brenda koalicioneve./ Opinion.al
