Që prej pasdites së djeshme opozita dhe mazhoranca kanë hedhur akuza në adresë të njëra-tjetrës në lidhje me ndryshimet kushtetuese. Për këtë çështje ka folur përfaqësuesi i Partisë Demokratike në Këshillin Politik, Oerd Bylykbashi.
Gjatë një interviste për “News24”, Bylykbashi shprehet se në mbledhjet e Këshillit Politik përfaqësuesi i mazhorancës, Damian Gjiknuri, ka thënë se për hapjen e listave do të diskutohet në një moment të dytë. Sipas Bylykbashit, palët ranë dakord, që listat e hapura të mos diskutoheshin, dhe u firmos me konsensus marrëveshja e 5 qershorit.
Përfaqësuesi i PDnë Këshillin Politik ka theksuar përsëri se partia e tij është e gatshme të përfshihet në diskutime që nuk e dëmtojnë marrëveshjen e 5 qershorit.
Cfarë do të diskutohet në mbledhjen e sotme?
Ne nuk donim të diskutonim mbi ndryshimet dhe në vazhdim të asaj që kërkuam ne, çështja duhet të vijë në Këshill, të ikë nga Parlamenti. Cdo diskutim duhet të jetë konsensual, transparent, gjithëpërfshirës. Ne jemi të gatshëm të zgjedhim sistemin, që i përshtatet më mirë qytetarëve.
Cili është më i përshtatshmi për ju dhe OSBE/ODIHR?
OSBE nuk jep një shembull, por thotë që sistemi duhet të jetë i thjeshtë dhe ky që kemi është i tillë. Nëse listat e mbyllura do të ishin bërë në mënyrë perfekte nga krerët e partive, ne nuk do ta kishim këtë problem. Ne mund të zgjedhim një sistem, që në kushtet që sot ka rënë Gjykata Kushtetuese, balancon më mirë raportet mes pushteteve. Se cili mund të jetë ky sistem, i mbetet diskutimit, që duhet të jetë i thellë me të gjithë ekspertët, edhe ndërkombëtarë, e shoqërinë civile.
Gjiknuri iu ka kërkuar të paraqisni propozimet tuaja…
Rama po tenton të ndryshojë rregullat themelore rreth 8 muaj para zgjedhjeve. Kjo është e papranueshme nga OSBE. Askush nuk pret që Rama të bëjë ndryshe, pasi është njeri që nuk di të respektojë marrëveshjet. Le ta kenë të qartë shqiptarët, do të ndryshohet sistemi zgjedhor, por kjo do të minojë procesin, sepse do na duhet të ndryshojmë rreth 40% të Kodit Zgjedhor. Duhet një diskutim i gjerë dhe i thellë./ opinion.al
