Oficerët e FBI-së së Britanisë arrestuan një 30-vjeçar shqiptar të dyshuar për kontrabandë emigrantësh nëpër Kanalin e La Manshit pas një bastisjeje të kryer mëngjesin e sotëm në jug-perëndim të Londrës.
I riu shqiptar u arrestua në zonën Tolworth Rise të Surbiton. Policia i sekuestroi shqiptarit një shumë parash dhe një tablet.
30-vjeçari u mor në pyetje nga oficerët e Agjencisë Kombëtare të Krimit (NCA) në Britani me dyshimin se është pjesë e një bande të krimit të organizuar që dërgon emigrantë me gomone.
“Përpjekjet për të arritur në Mbretërinë e Bashkuar me anije të vogla janë tepër të rrezikshme dhe ne e dimë se një përqindje e lartë lehtësohet nga rrjetet e organizuara kriminale të sofistikimit të ndryshëm. Këto rrjete nuk kujdesen për sigurinë e atyre që transportojnë, ata kërkojnë t’i shfrytëzojnë për përfitim. Rreziku që ata paraqesin do të thotë se zgjidhja e tyre mbetet një prioritet për NCA. Ne besojmë se operacioni i sotëm do të ketë ndërprerë aktivitetin e një rrjeti të tillë dhe hetimi ynë vazhdon”, tha Shefi Rajonal i Hetimit të NCA-së, Jacque Beer.
“Mail Online” shkruan se trafikantët shqiptarë mendohet se luajnë një rol të madh në lehtësimin e emigrimit të paligjshëm përtej Kanalit. Po ashtu thuhet se një numër i lartë shqiptarët janë në mesin e emigrantëve që udhëtojnë drejt Britanisë së Madhe./Opinion.al
