Bashkia e Tiranës, të dielën, lajmëroi se territori që deri më sot ka shërbyer si Garda e Republikës, do t’i kthehet qytetarëve si pjesë e parkut për çlodhje dhe argëtim.
Kështu ka preferuar t’i përgjigjet akuzave të Partisë Demokratike, ditën e sotme, kryebashkiaku Erion Veliaj.
Përmes një deklarate për mediat, PD bëri me dije se po betonizohet hyrja e Parkut të Liqenit.
Nga ana tjetër, për Veliajn jo vetëm që nuk po ndërtohet, por Parkut të Liqenit po i shtohen edhe sipërfaqe të tjera të gjelbërta.
Në inspektimin e hapësirave të reja që i bashkohen parkut, Veliaj tha se ato do t’i kalojnë në administrim Agjencisë së Parqeve dhe Rekreacionit, për ta bërë edhe këtë zonë një pjesë integrale të Parkut të Madh të Liqenit, çka i jep qytetit më shumë gjelbërim dhe oksigjen.
“Sot është një ditë shumë e mirë për qytetarët e Tiranës, kryesisht për ata qytetarë që frekuentojnë parkun e Tiranës. Një agjenci model e jona, si Agjencia e Parqeve dhe Rekreacionit, e ka transformuar plotësisht atë: Kemi përfituar të gjithë pjesën jugore, kemi shtuar pistat për biçikletat në hapësira ku njerëzit kalojnë për herë të parë, madje as nuk do ta besojnë se kjo ishte në Tiranë, një hapësirë e zaptuar, dhe u desh vullneti i kësaj bashkie e qeverie për të liruar territorin. Sot është një ditë akoma më e mirë sepse marrim edhe 2.5 ha nga Garda e Republikës, për t’ia shtuar parkut të Tiranës”, tha Veliaj.
Ai theksoi se transformimi që ka pësuar Parku i Madh i Liqenit në këto tre vite është shembulli më i mirë se edhe kjo zonë, që deri më tani ishte e ndaluar për qytetarët, të shndërrohet në një hapësirë plotësisht e aksesueshme dhe e shfrytëzueshme për ta.
Kryebashkiaku tha se akuzat e opozitës burojnë nga interesa të ngushta dhe krejtësisht private, e jo nga interesi i qytetarëve, të cilët duan që ky territor t’i shtohet parkut.
