Ditën e sotme bilbili i këngës shqipe, Nexhmije Pagarusha ka ndërruar jetë në moshën 86-vjeçare.
Presidenti i Kosovës Hashim Thaçi ka shprehur pikëllimin e tij për shuarjen e ikonës së muzikës shqiptare.
“Të pikëlluar me vdekjen e artistes së madhe, Nexhmije Pagarushës, e cila me zërin e saj e përjetësoi muzikën shqipe, duke i dhënë vlera të përjetshme, me të cilat krenohet krejt bota shqiptare.
Ndarja nga jeta e Nexhmije Pagarushës është një humbje e madhe për kulturën dhe artin tonë kombëtar.
Zëri i saj karakteristik e shndërroi në një ikonë të papërsëritshme, bazuar në dhuntitë dhe talentin e saj të pakufishëm. I përjetshëm do të mbetet emri dhe zëri i Bilbilit të Kosovës! HTH,”-përfundon Presidenti.
Kryetarja e Parlamentit në Kosovë Vjosa Osmani ka shkruar se këngët e saj do të mbeten pjesë e trashëgimisë sonë sonë kulturore dhe vlerë e patjetërsueshme e identitetit tonë.
“Sot, me dhimbje të madhe, mësova se është ndarë nga jeta ikona e muzikës shqipe, znj. Nexhmije Pagarusha.
Për dhjetëvjetësha të tërë, me zërin e saj kumbues, ajo e kultivoi muzikën e mirëfilltë shqipe, duke u shndërruar në mbretëreshën e saj.
Nga “Baresha” e deri te “Zambaku i Prizrenit”, këngët e saj do të mbeten pjesë e trashëgimisë sonë sonë kulturore dhe vlerë e patjetërsueshme e identitetit tonë.
Ne e kemi rritur shtatin duke i dëgjuar e ridëgjuar perlat e “Bilbilit të Kosovës”. Ndarja nga jeta nuk na ndan nga këngët e saj e nga trashëgimia e pasur artistike që na e la,”-përfundon ajo.
“Artistet kurre nuk vdesin!!! Prehu ne paqe Bilbili i Kosoves!!!,”-është shprehur bashkëshortja e ish-kryeminsitrit të Kosovës, Ramush Haradinaj, Anita Haradinaj./Opinion.al/
