Pas mbajtjes një minutë heshjte të ish-deputetit të PS, Andis Harasani, PS dhe PD janë përfhsirë përsëri në debate.
Kryedemorkati Berisha u kërkoi socialistëve që të kërkojnë ndjesë për largimin e Harasanit nga partia, ndërsa kryetari i PR, Fatmir Mediu tha se shteti shqiptar duhet të kontaktojë me familjen e ish-deputetit të ndarë nga jeta në mënyrë që t’i ndihmojë.
Këto deklarata sollën reagimin e Ministrit të Shtetit për Marrëdhëniet me Parlamentin, Taulant Balla, i kërkoi opozitës të mos bëjë politikë me vdekjen.
Balla nuk i kurseu sulmet politike ndaj Berishës, të cilin e cilësoi një buf që shpesh herë duket dhe si korb.
“Unë kam këtu në këtë sallë 20 vjet dhe kurrë nuk kemi bërë këtë që ndodhi sot mes njëri-tjetrit, asnjëherë për askënd. Andisin e kam pasur dhe e kisha shok, dhe po ashtu një pjesë e mirë e këtyre këtu dhe të tjerë. Por kurrë nuk na ka ndodhur kjo që u bë tani dhe propozimi i zotit Mediu. Zoti Mediu, faleminderit për këshillat, por gjithmonë këto i kemi bërë mes njëri-tjetrit. Jo në publik, jo në publik. Po dhe na kanë ndodhur dhe ngjarje të tjera të rënda kur kemi qenë gjithmonë bashkë, edhe miq, kolegë, anëtarë të grupit parlamentar të Partisë Demokratike të cilët sapo ishin përzënë, por ne nuk dolëm kurrë të bënim politikë me vdekjen. Unë e di që bufi dhe korbi nuk janë larg njëri-tjetrit, edhe bufi duket si korb herë pas here, por ju lutem shumë sa i përket kësaj çështje. Lëreni familjen të kalojë këtë moment të vështirë. Sa i përket çështjeve të tjera, bashkë me Ministrin e Jashtëm jemi të gatshëm t’ju japim çdo informacion të nevojshëm, për kontaktet, për masat dhe për gjithçka tjetër. Por ju lutem shumë, nuk shkon kjo. Nuk ka ndodhur asnjëherë kjo që po bëni sot”,- tha Balla.
