Ka ndërruar jetë Hulk Hogan. Legjenda e wrestling-ut vdiq në moshën 71-vjeçare, më 11 gusht do të mbushte 72.
Lajmin për ndarjen nga jeta të ikonës së wrestling-ut Hulk Hogan e ka bërë publik portali TMZ, duke shtuar se shkaku i vdekjes dyshohet të jetë një arrest kardiak.
Të enjten në mëngjes, personeli mjekësor ndërhyri në shtëpinë e tij në Florida, ku konfirmuan vdekjen si pasojë e një arresti kardiak.
Vetëm pak javë më parë, bashkëshortja e Hogan kishte mohuar zërat sipas të cilëve ai ndodhej në gjendje kome, duke deklaruar se zemra e tij ishte “e fortë” ndërsa po rikuperohej nga disa ndërhyrje kirurgjikale që kishte kaluar.
Hulk Hogan e shndërroi Wrestling-un profesionist në një sport argëtimi për gjithë familjen. Para tij, Wrestling-u i drejtohej një audience më të ngushtë. Teatraliteti i tij në ring ishte magnet për fëmijët dhe prindërit e tyre.
Hogan ishte gjithashtu një aktor dhe personazh televiziv amerikan (i paharrueshëm roli i tij në Rocky III). Ai lindi më 11 gusht 1953 në Augusta, Georgia, dhe u bë i njohur për karizmën, mustaqet bionde dhe shiritin e kuq në ballë. Në vitin 2005 u fut në WWE Hall of Fame. Të paharrueshme mbeten ndeshjet e tij kundër André The Giant (i ndarë nga jeta më 28 janar 1993), Undertaker dhe King Kong Bundy (i vdekur më 4 mars 2019).
Në vitet ’80, Hogan ishte rreth dy metra i gjatë, por me kalimin e viteve humbur rreth tetë centimetra në gjatësi, si pasojë e ndërhyrjeve të shumta kirurgjikale në shpinë dhe shtyllën kurrizore, edhe pas tërheqjes nga sporti, për shkak të dhimbjeve të forta fizike.
Në nëntor të vitit të kaluar, bënë xhiron e botës pamjet e legjendës së WWE që gris bluzën në skenë gjatë Konventës Kombëtare Republikane, pak para fjalimit të Donald Trump.
