Është ndarë nga jeta në moshën 82 vjeçare Aneta Rama, nëna e kryeministrit Edi Rama. Lajmi është konfirmuar nga vetë kryeministri përmes një postimi në “Facebook”.
Në rreshtat prekëse, Rama shkruan se “ishe drita dhe guri këndor i shtëpisë.”
“Ishe drita dhe guri këndor i shtëpisë ku u rritëm e u bëmë burra, e ku mbetëm gjithnjë fëmijë. E di, që deri sa të shoh dot diellin e yjet do të jesh me mua, e bukur dhe e fortë si askush. Do të na mungosh shumë, por asgjë më shumë nuk bëje dot për ne sesa e pamundura që bëre plot përkushtim gjithë jetën, prandaj prehu në paqe mam?”,-shkruan Rama.
Aneta Rama ka ndërruar jetë mëngjesin e sotëm në shtëpinë e saj. Ajo ishte e sëmurë, ndërsa ishte shtruar në spital, por një javë më parë Aneta Rama kishte lënë spitalin dhe qëndronte në shtëpinë e saj.
Përcjellja për në banesën e fundit do të bëhet në orën 17.00 në varrezat e Sharrës dhe për shkak të pandemisë do të ketë numër të kufizuar njerëzish. Aktualisht kryeministri Rama dhe i vëllai Olsi ndodhen në shtëpinë e nënës së tyre./ Opinion.al
