Në një intervistë për mediat gjermane, kritiku i Kremlinit, Alexei Navalny ka deklaruar se presidenti rus Vladimir Putin qëndron pas helmimit të tij të dyshuar por theksoi se ai nuk kishte frikë nga asgjë.
“Unë mendoj se Vladimir Putin Putin qëndron pas helmimit tim dhe nuk kam asnjë version tjetër të asaj që ka ndodhur”, tha Navalny për Der Spiegel.
“Ti nuk ke dhimbje por e ndjen që po vdes”, tha Navalny, teksa përshkruante momentin që agjenti nervor filloi të kishte efektet e para tek ai.
Navalny tha për Der Spiegel se do të kthehej në Rusi, duke shtuar se: “Detyra ime është tani të qëndroj i fortë, kjo është pikërisht ajo që do të bëj dhe nuk kam frikë!”.
Alexei Navalny, u sëmur rëndë gjatë një fluturimi nga Siberia për në Moskë muajin e kaluar. Qeveria gjermane konfirmoi substancën toksike, Noviçok në trupin e tij, dhe i kërkoi shpjegime të menjëhershme Rusisë.
Perëndimi ka kërkuar një shpjegim nga Rusia zyrtare, e cila ka mohuar çdo përfshirje në helmimin e Navalvyt dhe ka deklaruar se do të hetojë nëse konfirmohet se opozitari është helmuar.
Kjo nuk është hera e parë që qeveria e Moskës akuzohet për përdorim të substancës kimike Noviçok për të eliminuar kundërshtarët e saj. Në mars të 2018, ky agjent nervor tepër i rrezikshëm u përdor kundër ish agjentit sekret, Sergej Skripal dhe të bijës Yulia në Mbretërinë e Bashkuar./Opinion.al
