Kryeministri Rama ditën e sotme i ka bërë thirrje grave naftëtare në Ballsh që të ndalojnë grevën e urisë. Pas deklaratës së kryeministrit kanë reaguar naftëtarët. Në një deklaratë për mediat, ata janë shprehur se kryeministrin e presin në Ballsh, aty ku po vijojnë qëndresën prej 25 ditësh.
“Ne nuk kemi bërë asnjë presion karshi qeverisë. Të presim këtu në shesh, në Ballsh. Nuk kemi kërkuar asnjë gjë që ai nuk mund ta zgjidhë. Ne kemi kërkuar një vendim gjyqi të formës së prere që na jep të drejtë për pagat tona. Takimi është këtu tek ato naftëtaret që janë në grevë urie. Kemi shkuar në Tiranë dhe nuk kemi marrë përgjigje,” shprehet një prej tyre.
Ndërsa, një prej naftëtarëve është shprehur se nga kryeministri kërkojnë zgjidhje konkrete për çështjen e pagave dhe jo postime në “Twitter”.
“Ne duam zgjidhje konkrete nga kryeministri, jo të shkruajë në Twitter. Ai nëse do të negociojë me ne, ne negociojmë, por jo për pagat e prapambetura. Për punën. Pagat janë të panegociueshme, është një gjyq i fituar i paapelueshëm. Thjesht zbatim ligji kërkojmë. Kërkojmë punësim jo favorizim nga kryeministri” tha një nga naftëtarët.
Ditën e sotme kryeministri Rama shkroi në rrjetet sociale se hallin naftëtarëve nuk ia ka shkaktuar qeveria, ndërsa theksoi se zgjidhja nuk vjen me presione dhe ultimatume./Opinion.al
