TIRANE- Sekretari amerikan i Shtetit John Kerry nuk tha asnjë fjalë në publik për atë çka po zien fort më media këto ditë, ardhjen në Shqipërisë të rreth 2 000 muxhahidinëve. Edhe kryeministri Edi Rama duke folur për TCH pas vizitës së Kerryt u përpoq të theksonte se Kerry nuk ishte në Tiranë për këtë çështje. Por edhe pse nuk u lakua në publik kjo temë, besohet se është folur mes Kerry-t e Ramës edhe për këtë temë.
Por kush janë muxhahidinët iranianë?
Prej dy vitesh tek Unaza e Re në Tiranë, në dy godina të sapondërtuara jetojnë një numër i konsiderueshëm të huajsh që rrijnë me njëri-tjetrin dhe bisedojnë pak me fqinjët shqiptarë. Megjithatë ata kanë pasaporta shqiptare dhe janë shtetas të rregullt të Republikës së Shqipërisë. .
Prej vitit 2012 në Shqipëri kanë mbërritur 1 mijë persona nga Liberty Camp në Irak, ku ndodhen prej vitesh por tashmë ata janë të pasigurtë.
Ata janë opozita më e fortë e regjimit të Teheranit që kur një grupim politik shiia erdhi në pushtet pas një revolucioni ku rrëzuan monarkinë e shahut.
Gjithsesi, “muxhahidinët e populllit” u krijuan nga një grup ushtarakësh që kërkonin një republikë kushtetuese demokratike në vend, por ata janë vrarë e përndjekur nga qeveria iraniane.
Udhëheqësit e Rezistencës Kombëtare të Iranit janë të vendosur në Paris ku ata kanë selinë dhe çdo vit zhvillojnë një kongres kombëtar, në të cilin marrin pjesë krerë shtetesh e politikanë nga e gjithë bota.
Këshilli kombëtar i Rezistencës së Iranit është themeluar në vitin 1981 në Teheran, me iniciativën e Massoud Rajavi, lideri i Rezistencës Iraniane.
Janë pesë organizata të përfaqësuara nga NCRI, duke përfshirë Organizatën Popullore Muxhahidinwt e Iranit (PMOI / MEK) grupi më i madh dhe rezistent në Iran.
Asnjë shtet europian dhe botëror nuk ka pranuar të presë opozitën e Iranit, aq më shumë tani që u hoqën saknsionet dhe të gjithë presin të bëjnë tregti me një treg të madh me mbi 80 milionë banorë.
Muxhahidinët kanë aktivitet politik në të gjithë Europën përveçse në Shqipëri, për arsye se rrezikojnë jetën e njerëzve të tyre.
Siç bëri të ditur një ekponent i tyre, ata i druhen shërbimit sekret iranian, i cili në Shqipëri ka struktura mjaft të forta dhe ndjek thuajse çdo veprim të muxhahidinëve.
Në krye të organizatës është Maryam Rajavi, një grua që është bashkëshortja e ish-themeluesit të lëvizjes së muxhahidinëve.
