Policia e Tiranës ka arritur të zbulojë një sasi të madhe armësh dhe municionesh në një vend të fshehur në malin e fshatit Kllojkë, rreth 1 orë e 30 minuta larg kryeqytetit. Gjithashtu janë sekuestruar edhe mbi 30 kg kanabis sativa e tharë dhe e presuar.
Armatimi është klasifikuar i rëndë nga policia: 4 automatikë kallashnikov dhe 2 pushkë; si dhe droga janë gjetur të groposura në tokë.
Operacioni është zhvilluar nga forcat e Komisariatit numër 1, të cilat kanë qenë në ndjekje të poseduesve të armëve dhe drogës pas informacioneve të marra në rrugë operative. Ndërkohë operacioni vijon ende për kapjen e personave të dyshuar. /Balkanweb
