Është shtyrë sërish gjyqi për Kelment Balilin. Në seancën e sotme në Gjykatën e Krimeve të Rënda ku do të jepej pretenca, nuk ka qenë i pranishëm as vetë Balili dhe as avokati i tij Theodhori Sollaku. Seanca e radhës do të zhvillohet më 2 prill.
Më parë, gjykata vendosi të pranojë kërkesën e Balilit për gjykim të shkurtuar, duke paralajmëruar se gjyqi ndaj tij do të mbyllej në pak seanca. Por kjo gjë nuk ka ndodhur, pasi nga seanca në seancë gjendet një arsye për ta shtyrë. Javën e kaluar, avokati Sollaku tha se nuk mund të merrte pjesë për arsye shëndetësore.
Balili u vetëdorëzua në mëngjesin e 15 Janarit në Policinë e Tiranës, pas dy vitesh arrati. Po kaq kohë kanë zgjatur edhe hetimet për të, pjesa më e madhe e të cilave është e bazuar në përgjigjet e marra nga letërporositë e ardhura nga Greqia.
Ai akuzohet për “Trafikim të lëndëve narkotike në bashkëpunim, “pjesëmarrje në grupin e strukturuar kriminal”, “refuzim për deklarim, mosdeklarim, fshehje ose deklarim i rremë i pasurive”, si dhe për “pastrim parash”./Opinion.al
