Udhëheqësi i Koresë së Veriut Kim Jong Un ka bërë thirrje për një “përmirësim rrënjësor” në sektorin e makinerive bujqësore të vendit, raportoi media shtetërore të mërkurën, ndërsa shteti i izoluar përpiqet të modernizojë bujqësinë për të trajtuar mungesat kronike të ushqimit.
Duke vizituar një ekspozitë të makinave bujqësore të martën, Kim tha se ishte e rëndësishme të hartohej një plan zhvillimi afatgjatë për të arritur mekanizimin e punës bujqësore për zhvillimin rural, tha agjencia e lajmeve KCNA, raporton Reuters.
“Përmirësimi rrënjësor i industrializimit bujqësor është një nevojë prioritare,” tha Kim, sipas KCNA.
Reuters kujton se kreu i shtetit prezantoi disa ditë më parë objektivat ekonomike për vitin 2024 dhe vuri në dukje se prodhimi bujqësor në nivel të lartë është një “detyrë kyçe”.
Qindra prodhues të makinerive bujqësore, duke përfshirë traktorë, transplantues orizi dhe helikopterë pa pilot, ekspozuan në panair.
Koreja e Veriut ka vuajtur nga mungesa të rënda ushqimore në dekadat e fundit, dhe në vitet 1990, vendi përjetoi zi buke të shkaktuar nga fatkeqësitë natyrore.
