Të vetmen mundësi që mazhoranca qeverisëse ka ndaj vendimit të Presidentit Ilir Meta për anulimin e datës së zgjedhjeve lokale, është Gjykata Kushtetuese. Në këtë gjykatë, pas një votimi me ¾ e votave në Kuvend, mund të kërkojë shkarkimin e kreut të shtetit, duke u bazuar në Kushtetutë.
Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë, sipas procedurës së parashikuar në nenin 90, pika 2 dhe 3.
Në këto momente kur vendi është pa gjykatë, një shkarkim i Ilir Metës nga posti i Presidenti mbetet i pamundur.
Por sa zgjat krijimi i Gjykatës Kushtetuese? Pavarësisht zërave nga qeveria se ajo krijohet në fund të muajit qershor duket e pamundur. Neni 125 i Kushtetutës thotë se Gjykata Kushtetuese përbëhet nga 9 anëtarë, të cilët emërohen nga Presidenti i Republikës me pëlqimin e Kuvendit.
Gjyqtarët emërohen për 9 vjet, pa të drejtë riemërimi, nga radhët e juristëve me kualifikim të lartë dhe me përvojë pune jo më pak se 15 vjet në profesion. Përbërja e Gjykatës Kushtetuese përtërihet çdo tre vjet në një të tretën e saj sipas procedurës së caktuar me ligj. Kryetari i Gjykatës Kushtetuese emërohet nga radhët e anëtarëve të saj nga Presidenti i Republikës, me pëlqimin e Kuvendit, për një periudhë prej 3 vjetësh. Gjyqtari i Gjykatës Kushtetuese vazhdon në detyrë deri në emërimin e pasardhësit të tij.
Po ashtu sipas juristit Jordan Daci, 3 anëtarë të kësaj gjykate zgjidhen nga Gjykata e Lartë. Edhe kjo gjykatë është jashtë funksionimit pasi anëtarët e saj u përjashtuar nga vettingu. Kështu, koha që do dojë formimi i Gjykatës Kushtetuese është e largët.
Nga nisja e vetting-ut në mars 2018 me Fatos Lulon, anëtar i Gjykatës Kushtetuese mjaftuan 10 muaj që kjo Gjykatë të shkërmoqej duke mbetur me vetëm një gjyqtar Kushtetues.
Vitore Tusha, profesoreshë e të drejtës civile, me gradë “doktor i shkencave juridike” në këtë fushë dhe anëtare e Gjykatës Kushtetuese prej 11 vitesh, është e vetmja që u konstatua e pastër nga procesi rivlerësues.
Pas shkarkimit të Lulos nga detyra, u rrëzuan njëri pas tjetrit katër anëtarët e tjerë: Altina Xhoxhaj, Fatmir Hoxha, Gani Dizdari. I humbur doli gjatë rivlerësimit të trefishtë edhe kryetari i kësaj gjykate Bashkim Dedja. Me pesë shkarkime nga detyra dhe tre dorëheqje të gjyqtarëve Sokol Berberi, Vladimir Kristos, dhe Besnik Imeraj kjo gjykatë pushoi së funksionuari.
Ndërkohë të dhënat statistikore tregojnë se 79 kërkesa vazhdojnë të jenë në pritje për tu shqyrtuar, prej të cilave 17 janë depozituar gjatë 2019 dhe 62 i përkasin vitit të kaluar./Opinion.al
