Lulja e basanit është përdorur prej vitesh, veçanërisht e përzier me vajin e ullirit, si një balsam kurativ dhe rigjenerues, në rastet e prerjeve, djegieve dhe plagëve të ndryshme por edhe si një çaj qetësues.
Kërkimet e zhvilluara vitet e fundit tregojnë se lulja e basanit mund të ndihmojë në kurimin e formave të lehta dhe të mesme të depresionit.
Për më tepër këto kërkime shtojnë së kjo bimë ka efekte anësore më të pakta dhe më të lehta, në krahasim me mjekimet antidepresive. Por lulja e basanit mund të bashkëveprojë me mjekime të caktuara që merren për të kuruar depresionin, prandaj duhet që gjithmonë të merret nën supervizimin e mjekut.
Në Shtetet e Bashkuara të Amerikës, Administrata e Ushqimit dhe Medikamenteve (Food and Drug Administration, FDA) nuk e ka aprovuar përdorimin e lules së basanit, si një mjekim që mund të jepet për të kuruar depresionin, ndërkohë që qeveria gjermane e ka lejuar përdorimin e jashtëm të vajit të basanit për kurimin e plagëve, dëmtimeve muskulore dhe djegieve të shkallës së parë. Megjithatë në dekadat e fundit, kërkimi shkencor është përqëndruar në përdorimin e lules së basanit si një qetësues.
Kjo lule, e zier në formën e një çaji, mund të përdoret për probleme të lidhura me pagjumësinë, luhatjet e humorit, ankthin dhe depresionin. Kërkimet kanë dalë në përfundime se ky çaj nuk ka veti kuruese të menjëhershme, por mund të kërkojë më shumë kohë për të shëruar simptomat, se sa ilaçet e tjera më të forta, që mund të kenë efekt më të shpejtë.
