Në kohën kur që nga mbrëmja e djeshme vendi është përfshirë nga kushte të këqija të motit me reshje intensive, Policia Rrugore , forcat e Posaçme “Shqiponja”, Patrullat e Përgjithshme dhe Forcat e Ndërhyrjes së Shpejtë do të jenë në gatishmëri për të menaxhuar trafikun dhe për t’iu ardhur në ndihmë drejtuesve të mjeteve, në rast nevoje.
Teksa njofton se në segmentet rrugore ka prezencë të ujit dhe në këto kushte rreziku i përfshirjes në aksidente është më i lartë, policia iu bën thirrje të gjithë drejtuesve të automjeteve të respektojnë rregullat e qarkullimit rrugor dhe të jenë të kujdesshëm.
“Shërbimet e Policisë Rrugore, në gatishmëri, në të gjitha rrugët e vendit, për të menaxhuar trafikun dhe për t’iu ardhur në ndihmë drejtuesve të mjeteve, në rast nevoje, në situatën e krijuar si pasojë e motit të keq.
Në gatishmëri janë edhe shërbimet e Forcës së Posaçme “Shqiponja”, Patrullat e Përgjithshme dhe Forcat e Ndërhyrjes së Shpejtë.
Për shkak të reshjeve të shiut, në segmentet rrugore ka prezencë të ujit dhe në këto kushte rreziku i përfshirjes në ngjarje rrugore është më i lartë.
Policia e Shtetit ka rritur prezencën e shërbimeve të Policisë, në të gjitha akset rrugore, me qëllim parandalimin e aksidenteve rrugore dhe monitorimin e qarkullimit të automjeteve të akset rrugore në të cilat janë krijuar vështirësi për shkak të motit të keq.
Policia Rrugore apelon për të gjithë drejtuesit e automjeteve dhe motomjeteve, që të respektojnë me rigorozitet sinjalistikën rrugore, të moderojnë shpejtësinë, të vendosin rripin e sigurimit dhe të mos përdorin celularin gjatë drejtimit të automjetit.
Drejtuesit e automjeteve dhe të motomjeteve të ndjekin dhe të zbatojnë me rigorozitet udhëzimet e Policisë Rrugore dhe të telefonojnë në numrin 112, për problematikat që mund të hasin gjatë udhëtimit të vështirësuar për shkak të motit të keq”-njofton policia.
