Ministria e Mbrojtjes ka dhënë detaje për situatën e krijuar në vend pas reshjeve të ditës së djeshme. Në një njoftim për mediat bëhet me dije se situata në qarkun e Kukësit këtë të dielë paraqitet më e qetë.
Sipas informacioneve nga Agjencia e Mbrojtjes Civile, në bashkinë Tropojë ku pati dëme, gjendja është normalizuar, ndërkohë që vazhdon puna në terren nga grupet e punës për eliminimin e pasojave.
Në mbështetje të forcave në terren po punojnë mjete dhe forca e batalionit të Xhenios dhe Batalionit të Mbështetjes së Emergjencave Civile. Ndërsa bashkia ka ngritur grupet e vlerësimit të dëmeve.
Aktualisht në territorin e bashkisë Tropojë: Rrugët nacionale janë të qarkullueshme normalisht. (Curri-Valbonë, Ura e Bujanit-Qafe Morine, Sopot-Kerrnaj, Qafe Mejdan-Tropojë-Buçaj, B.Curri-Cërrnicë dhe B.Curri –Fierzë). Ndërsa Rruga Lekbibaj- Fierzë është e bllokuar nga rrëshqitjet e gurëve dhe po punohet me mjetet e bashkisë për zhbllokimin e segmentit rrugor Lekbibaj-Sheshi i trageteve Fierzë.
Gjithashtu po punohet nga grupet e punës së OSHEE për riparimin e defektit në nënstacionin elektrik në Gropë Fierzë dhe rikthimin e energjisë në njësinë administrative Fierzë dhe fshatin Valbonë. Sakaq, në fshatin Degë njësia administrative Fierzë është dërguar një fadromë në mbështetje të komunitetit.
Në qarqet e tjera të vendit situata është e qetë dhe nuk janë vërejtur problematika./Opinion.al
