Ministri i Mjedisit, Lefter Koka ka thënë ditën e sotme se aplikimi i akcizës për gazin e lëngshëm që përdorin automjetet duhet të rishikohet.
Koka tha se janë vetëm 3 % të mjeteve në vend që përdorin gaz të lëngshëm për karburant dhe kjo nuk e prish raportin.
“Do kërkoja që të paktën ky zë në paketën fiskale të rishikohet. Nuk po them të subvencionohet, por s’mund t’i vihet akcizë pasi janë rreth 3 për qind e automjeteve që sot përdorin gazin e lëngshëm dhe nuk besoj se prishen ekuilibrat”, deklaroi ai.
Sipas minisrit të Mjedisit, ky taksim shkon në kundërshtim me politikat dhe angazhimet për uljen e ndotjes nga djegia e karburanteve.
“Po ta shohësh si shifër, nëse kemi thënë se do investohen deri në vitin 2030 miliona euro dhe në këtë zë është rreth 100 milionë euro, presupozohet investim nga privatët. Çka do të thotë që çdo qytetar që disponon një automjet monton një impiant gazi që e blen me kosto të ulët dhe në këtë rast ne duhet t’i stimulojmë dhe jo t’i vendosim akcizë”, nënvizoi Koka.
Qeveria ka miratuar paketën e re fiskale, ku përcakton aplikimin e akcizës për gazin e lëngshëm që përdorin makinat në masën 13 lekë për litër.
Në relacionin e paketës fiskale, qeveria argumenton se aplikimi i akcizës për gazin e lëngshëm për automjete në nivelin 13 lekë/litër bëhet me qëllim përafrimin me standardet e BE-së dhe të vendeve të rajonit që e taksojnë këtë produkt.
Deri më sot, gazi i lëngshëm për automjetet është përjashtuar nga akciza, por në të gjitha vendet e Europës ai taksohet si produkt energjetik, pra si nafta dhe benzina.
