Rasul Miklaev ka kërkuar përpara trupit gjykues të Gjykatës së Durrësit të mos ekstradohet në Rusi pasi atje i rrezikohet jeta.
“Ju lutem mos më deportoni në Rusi sepse atje do të më vrasin” tha në sallën e gjyqit 34-vjeçari që akuzohet për pjesëmarrje në organizatë terroriste. Seanca e tij u shty për në datën 10 shtator pasi nuk u paraqit përfaqësuesi i prokurorisë. Kjo e fundit ka kërkuar shqyrtimin e ekstradimit të Mikhalev në Rusi ku akuzohet se ka lidhje me terrorizmin.
Ai u arrestua disa ditë më parë në Shqipëri pasi një gjykatë në Nadterechni, republika Çeçene / Rusi, e ka dënuar për pjesëmarrje në organizatë terroriste.
“Unë krijova një organizatë për të mbledhur ndihma për viktimat e luftës në Siri, nuk jam terrorist. Mos më dorëzoni në Rusi se më rrezikohet jeta!”, ka thënë edhe më herët Rasul Miklaev.
Megjithatë provat ndaj tij tregojnë se ai në vitin 2013 ka udhëtuar nga Rusia për në Siri ku i është bashkuar grupimit terrorist të Jaish al Muhaxhirin al Answar, pjesë e shtetit islamik ISIS. /Opinion.al
