Mediat ndërkombëtare vijojnë t’i bëjnë jehonë arrestimit të ish-zyrtarit të lartë të kundërzbulimit të FBI-së Charles McGonigal. Sipas CNN, ndaj tij janë ngritur dy aktakuza të veçanta. Bëhet fjalë për ndihmën ndaj një oligarku rus, duke shkelur sanksionet amerikane dhe fshehjen e qindra mijëra dollarë që mori nga një ish-punonjës i një agjencie të inteligjencës shqiptare.
Charles McGonigal deklaroi se është i pafajshëm nëpërmjet avokatit të tij në një gjyq të hënën pasdite në Nju Jork lidhur me akuzat për shkeljen e sanksioneve amerikane, komplot dhe pastrim parash për punën në vitin 2021 me oligarkun rus Oleg Deripaska.
Në Uashington, McGonigal akuzohet për fshehjen e lidhjeve që kishte me një person që dekada më parë ka punuar për një agjenci të inteligjencës shqiptare, duke përfshirë edhe marrjen e 225,000 dollarëve pagesa.
Prokurorët thonë gjithashtu se ai nuk dha emrin e personit që e shoqëronte gjatë udhëtimit, si dhe nuk informoi se qëndrimi i ishte siguruar falas.
Po ashtu CNN shkruan se Charles McGonigal ka ardhur në Shqipëri, ku ka zhvilluar një takim me kryeministrin shqiptar dhe i ka kërkuar që të jetë “i kujdesshëm në lidhje me dhënien e licencave për shpimin e naftës në Shqipëri për kompanitë ruse”. Ish-punonjësi i inteligjencës shqiptare që i pagoi 225 mijë dollarë kishte interes financiar në vendimin e qeverisë për kontratat, thuhet më tej në artikull.
Ish agjenti i FBI duhet të kishte raportuar në FBI kontaktet me zyrtarë të huaj, por prokurorët thonë se ai i pati fshehur këto nga punëdhënësi, ndërsa vazhdonte me udhëtime pune dhe ndërkombëtare që e vendosën në konflikt interesi me detyrat e tij si oficer i zbatimit të ligjit./Opinion.al
