Studentët e departamentit të Drejtësisë të Universitetit “Ismail Qemali” Vlorë, janë shpallur fitues të edicionit të nëntë konkursit kombëtar Moot Court Albania 2022.
Me qëllimin për të ndihmuar studentët të vendosin në praktikë dhe të thellojnë njohuritë e tyre në fushën e të drejtave të njeriut dhe jurisprudencën e Gjykatës së Strasburgut, në këtë konkurs studentët kanë punuar mbi një rast fiktiv, i cili përgatitet për këtë qëllim dhe przantohet në një fazë me shkrim dhe dy faza me gojë. Konkurentët përgatiten për rolin e Kërkuesit dhe Shtetit të Paditur.
Nën udhëheqjen e pedagoges Dr. Jonida Mehmetaj, skuadra e Departamentit të Drejtësisë Vlorë, përbëhet nga studentët: Indrit Lita, Klaudia Imeraj, Eugerta Gropa, Klaudia Brakaj, Bianka Kananaj dhe Lidia Agalliu.
Ky konkurs është pjesë e nismës rajonale “Regional Moot Court Competition” me përfaqësues nga vendet e Ballkanit Perëndimor.
Duke vlerësuar si shumë të rëndësishëm procesin e promovimit të standardeve, lirive dhe të drejtave të njeriut si një pjesë e pandarë e konsolidimit të shtetit të së drejtës dhe numrit gjithnjë në rritje të rasteve të dërguara nga qytetarët shqiptarë në GJEDNJ, Civil Right Defenders dhe Fondacioni Qendra Europiane realizuan për të nëntin vit rradhazi konkursin “Albanian Moot Court Competition” me studentët e fakulteteve të drejtësisënë rang vendi.
Skuadra e Departamentit te Drejtësisëtë Universitetit të Vlorës do të përfaqësojë Shqipërinë në nivel rajonal, që do të zhvillohet në Mal të Zi 2023.
Skuadra përfaqësuese e Departamentit të Drejtësisë, Universiteti “Ismail Qemali” Vlorë ka fituar tre herë vendin e parë në konkursin kombëtar Moot Court Albania, në vitin 2017, 2019 dhe 2022.
