Ju prezantojmë me veturën elektrike sportive të së ardhmes, të quajtur “VW GT GE” – një veturë me një dizajn mahnitës nga shqiptari Eljesah Shala i cili jeton në Gjermani.
Nëse elementet e veçanta të këtij modeli duken të njohura për ju, veçanërisht në profil, kjo është për shkak se dizajnuesi i saj u inspirua nga aeroplani Biplan.
Projekti i Shalës është sponzorizuar nga Volkswagen Design në Wolfsburg. Dizajni i tij ka mahnitur të gjithë, sa që pothuajse të gjitha uebfaqet e njohura të veturave në botë e kanë publikuar atë, shkruan Gazeta Express.
Ai e ka dizajnuar veturën gjatë studimeve si projekt përfundimtar për Baçelor, gjatë kohës kur ai punoi si dizajnues i veturave në VW Design, Wolfsburg.
Eljesah, 29 vjeç, që është me prejardhje nga Peja, erdhi në Gjermani kur ishte vetëm 2 vjeç. Ai studioi Dizajnin e Automjeteve në Universitetin e Arteve në Braunschweig në Gjermani.
Në pyetjen se çfarë mendon të bëjë në të ardhmen, Shala për Express ka thënë: “Nëse më jepet një shans i mirë për punë me kontaktet që i kam, ia filloj punës. Por, njëherë e kam në plan të vazhdoj studimet Master për një titull më të lartë në këtë fushë”.
Ai thotë se talenti i tij për të dizajnuar vetura ka filluar të vërehet qysh në moshën 6-vjeçare, ku për t’u bërë dizajner veturash vendosi në moshën 12-vjeçare.
foto te projektit
