Mjeku italian, Raffaele Bruno, është një nga shumë specialistët e infektivit italian që punon prej 80 orësh pa u kthyer në shtëpi dhe pa parë familjen e tij, për shkak të përhapjes së shpejtë të koronavirusit, duke u kthyer kështu në simbol të bluzave të bardha.
Nga ana tjetër, 38-vjeçari Mattian, nga Castiglione d’Adda, konsiderohet si pacienti “numër 1”, pra i sëmuri i parë me koronavirus në Itali. Ai është në krahun tjetër, simboli i pacientëve që po përpiqen të mbijetojnë.
Doktorin dhe “pacientin 1”, fati i ka bashkuar në Poliklinikën San Matteo në Pavia, në djepin e Infektivologjisë Italiane.
Por si po trajtohen aty të infektuarit dhe çfarë ka të re?
Doktori Raffaele Bruno u shpreh se nuk ka një kurë specifike për kurimin e virusit por sqaroi se trajtimi i pacientëve në gjendje më të agravuar është i njëjtë.
Ai tregon se në mesin e shumë ilaçeve gjendet edhe një ilaç anti-HIV që nuk përdorej më, të cilin e japin dy herë në ditë. I pyetur se pse përdoret ky ilaç, doktori sqaron se ka një substancë aktive të quajtur Lopinavir, e cila është e pranishme në virusin HIV por edhe tek koronavirusi.
Sipas Brunos, të tjera ilaçe që përdoren është Ribavirina, një antiviral i vjetër i përdorur për gripin dhe disa antibiotikë për të parandaluar infeksionet bakteriale.
Ai nënvizon se për momentin duhet të jenë të kënaqur me rezultatet paraprake të cilat janë inkurajuese, por ende nuk ka diçka afat-gjatë. Sipas tij këto janë trajtime që kanë rezultuar të efektshme në laborator, dhe që janë përdorur tashmë në Kinë dhe Kore./Opinion.al
