Rasti i fundit i aksidentit me monopatina ku mbetën të lënduar 3 të mitur në Bulevardin “Dëshmorët e Kombit”, sipas specialistëve të Spitalit Universitar të Traumës shërben si kambanë alarmi, pasi ngjarje të tilla janë shtuar gjithnjë e më shumë.
“Ne si mjek jemi kundër përdorimit të monopatinave nga fëmijët, ky është problemi. Numri i rasteve sa vjen e shtohet dhe sidomos gjatë periudhës së verës është edhe më i lartë ndoshta edhe sepse pjesa më e madhe e shkollave mbyllen, pjesa më e madhe e adoleshentëve janë nëpër rrugë. Nëse një herë po thonim erdhi dikush që ka një dëmtim me monopatinë, tani po themi ka thuajse çdo ditë,” tha Ilir Hasmuça, kirurg-ortoped, Spitali i Traumës.
Traumat nga këto aksidente janë nga më të ndryshmet që nga dëmtimi i gjymtyrëve e deri tek frakturat e rënda në kokë.
“Gama e dëmtimeve është nga më të ndryshmet, nga trauma më e thjeshtë që mund të jetë një frakturë e thjeshtë e kërcirit, dorës apo femurit deri te politraumat e kokës, te frakturat e anësive te frakturat e brinjëve dhe dëmtime të pumbanave. Më saktë edhe nëse po themi ia del ti mbijetosh traumës, patjetër që do të mbetet me pasoja afatgjata për të gjithë jetën e vet.”
Edhe mungesa e masave të sigurisë për ata që përdorin këto mjete elektrike sipas mjekëve është një shqetësim tjetër.
“Problemi më i madh i monopatinës është që nuk ka element sigurie, ky është motor elektrik le të themi. Ato që e përdorin nuk përdorin asnjë mjet sigurie të tipit kokore, gjunjëse, mbrojtëse. Ajo që kam vënë re unë është që nuk zbatohet asnjë rregull të kodit rrugor.”
Specialistët e Spitalit Universitar të Traumës rekomandojnë ashpërsim të masave për përdoruesit e monopatinave, e veçanërisht për moshat e vogla.
“Ndoshta ka ardhur momenti tyre propozohet një projektligj i mirë, që të rregulllohet se kush mund t’a përdor dhe kush jo. Fëmijët adoleshentët, po themi njerëzit që akoma nuk janë në gjëndje të marrin përgjegjësi, është më mirë të shmangeshin.“
1 nga 3 të miturit e moshave 9-11 vjeç që mbetën të lënduar nga aksidenti në bulevardin e kryeqytetit, është i intubuar në Reanimacionin e Traumës, për shkak të dëmtimeve në kokë, ndërsa dy të tjerët janë jashtë rrezikut për jetën.
Klan News
