Presidenti rus Vladimir Putin viziton gjatë ditës së sotme Korenë e Veriut për herë të parë në 24 vjet. Vizita dy-ditore vjen në një kohë kur dy vendet forcojnë aleancën e tyre kundër presioneve në rritje nga Uashingtoni.
Në Phenian rrugët janë zbukuruar me portretet e Putinit dhe flamujt rusë. Në një pankartë të varur në një ndërtesë shkruhej: “Ne mirëpresim ngrohtësisht Presidentin e Federatës Ruse”.
Në një shkrim të botuar nga media shtetërore e Koresë së Veriut pak para mbërritjes së tij, Putin vlerësonte mbështetjen e palëkundur të Phenianit për pushtimin e Ukrainës dhe deklaroi se të dy vendet do të kundërshtonin me vendosmëri ato që ai i përshkroi si ambicie perëndimore “për të penguar krijimin e një bote shumë-polare.”
Putin bëri po ashtu të ditura planet për të zhvilluar sisteme të reja tregtare dhe pagesash të pavarura nga kontrolli perëndimor dhe për të kundërshtuar ato që ai i cilësoi si “masa kufizuese të njëanshme dhe të paligjshme” të vendosura nga Perëndimi.
Kujtojmë se Koreja e Veriut është nën sanksione të rënda ekonomike të Këshillit të Sigurimit të OKB-së për armët e saj bërthamore dhe programet e raketave, ndërsa Rusia po përballet gjithashtu me sanksione nga SHBA dhe partnerët e saj perëndimorë për agresionin e saj në Ukrainë.
