Parlamenti i Maqedonisë ka miratuar sot emërimin e ministrave dhe zëvendësministrave të rinj në Qeverinë maqedonase, propozuar nga partia shqiptare Bashkimi Demokratik për Integrim.
Ata morën votat e deputetëve të VMRO-DPMNE-së dhe BDI-së, pasi deputetët e LSDM-së votuan kundër, ndërsa ata të PDSH-së u larguan nga salla para votimit.
“Edhe krahas kapaciteteve të kufizuara të qeverisë teknike, pres nga këta persona të vazhdojnë me zbatimin e programit dhe projekteve të qeverisë. Të kenë punë produktive në dikasterin që drejtojnë”, tha Emil Dimitriev, kryeministër i Maqedonisë.
Emërimi i ministrave është shoqëruar me polemika mes deputetëve të shumicës dhe opozitës.
“Sot nuk u zgjodhën ministra dhe zv/ministra, por u konstatua mos suksesi i ministrave të kaluar. Do të konstatohet mos suksesi i BDI-së si pjesë e Qeverisë gjatë 13 viteve. BDI janë në Qeveri vetëm për të vjedhur dhe për të mbajtur pushtetin. Me emërimet dëshironi që të bëni reforma, por askush nuk ju beson. Nuk mund të fshehin problemin e brendshëm. Keni zgjedhur ministra jofunksional, për shkak se nga dita e nesërme fillon periudha zgjedhore”, theksoi Ymer Aliu, deputet i PDSH-së.
Me propozim të kreut të BDI-së, Ali Ahmeti, Arbër Ademi është emëruar zv.kryeministër për Çështjet Europiane, kurse Festim Halili, zv.kryeministër për zbatimin e Marrëveshjes së Ohrit. Valdet Xhaferi do të udhëheqë Ministrinë e Drejtësisë; Pishtar Luftiu atë të Arsimit; Driton Kuçi Ekonominë; Bashkim Ahmeti, Ministrinë e Ekologjisë; ndërsa Shyrete Elezi, atë të Pushtetit Lokal.
Sakaq, sipas “Tetovasot”, dy ministra të emëruar nga Bashkimi Demokratik për Integrim nuk mund të kalojnë edhe filtrat e kryeministrit Emil Dimitriev, pasi ata kanë kryer vepra penale më parë dhe ende nuk dihet nëse i kanë pastruar apo jo.
Gjithçka mbetet të shihet ditëve në vijim para datës 7 prill ku pritet të shpërbëhet parlamenti dhe të vendoset data e zgjedhjeve 5 qershor.
Teksa edhe opinioni e as disa nga strukturat partiake nuk e kanë pritur krah hapur emërimin e ministrave të rinj pasi shumica e tyre janë pa bagazh politik dhe pa përvojë institucionale, shkruan “INA”.
