Miqësorja midis Shqipërisë dhe Kosovës që ishte vendosur të luhej në Zvicër është pranë anulimit për shkak se Federata Zvicerane thotë se kjo sfidë cënon sigurinë.
Edhe presidenti i Federatës Kosovare të Futbollit, Fadil Vokrri në një intervistë për ‘Kosova Press’ thotë se nuk kanë mundur të sigurojnë një leje për zhvillimin e ndeshjes në Zvicër.
“Po afër anulimit është sepse Federata e Futbollit Zviceran nuk e ka dhënë lejen. Duhet tashmë vetëm njoftimi zyrtar për anulimin e miqësoren që ishte programuar në fund të këtij muaji. Edhe opsionet për zhvendosjen e miqësores në një stadium tjetër, po bien nga dita në ditë”, u shpreh Vokrri.
Ndërkohë presidenti i FSHF-së Armand Duka ka konfirmuar për ‘Top Channel’ se lajmi është i vërtetë.
“Po është e vërtetë ajo që ka deklaruar presidenti Vokrri dhe ne jemi duke kërkuar mundësi të tjera për të shfrytëzuar këtë periudhë sa më mirë për ekipin dhe trajnerin”,ka thënë presidenti Duka.
Ndeshja midis Shqipërisë dhe Kosovës ishte parashikuar të luhet në datë 29 maj në Zvicër.
