De Biazi do të dalë nesër para mesditës në një konferencë për shtyp në mjediset e FSHF-së, për të shpalosur strategjinë dhe pritshmëritë e tij nga dy ndeshjet miqësore të këtij muaji, më 26 mars në Vjenë, ndaj Austrisë, dhe më 29 mars në fushën e Luksemburgut.
Nisin, kësisoj, përgatitjet zyrtare për finalet e “Euro 2016”, ku Shqipëria merr pjesë për herë të parë, si një nga 24 skuadrat më të mira të kontinentit.
Natyrisht, të gjithë janë në pritje të listës së lojtarëve, që trajneri kuqezi ka ftuar dhe nesër do t’i zyrtarizojë.
“Telesport.al”, në mënyrë ekskluzive, ka arritur të sigurojë emrat e lojtarëve, të cilët do të jenë pjesë e kombëtares për këto dy miqësore.
Nuk ka shumë surpriza, sepse janë të njëjtët e fushatës kualifikuese. Shqetësim mund të përbëjë fakti se ndër ta ka edhe lojtarë pa minuta fare në këmbë, apo me aktivizim të paktë në klubet e tyre, ndërkohë që vijon të përbëjë habi të madhe, çka duhet sqaruar patjetër nesër nga De Biazi, lënia jashtë e Alban Mehës.
“Snajperi” po zhvillon një sezon mbresëlënës në Turqi, me Konyasporin, ka shënuar eurogola dhe i ka prirë skuadrës së tij drejt zonës europiane, për të cilën po lufton për momentin.
Ashtu si Hamdi Salihi, goleadori i spikatur i Skënderbeut kampion, si në kualifikueset e Ligës së Kampioneve, në fazën e grupeve të Ligës së Europës dhe në garat kombëtare në Shqipëri, kampionat dhe Kupa e Shqipërisë.
Vetëm dy emra janë nga Superliga, të dy portierë, Orges Shehi dhe Alban Hoxha. Askush tjetër. Në mbrojtje rikthjehet Mërgim Mavraj, i cili e ka lënë pas dëmtimin dhe ka nisur të aktivizohet me Këlnin.
De Biazi i beson ende Veselit, i cili debutoi me kuqezinjtë në miqësoret e nëntorit të vitit të shkuar, kundër Kosovës dhe Gjeorgjisë. Ai nuk ka qenë pjesë e eliminatoreve në grup, ku Shqipëria zuri vendin e dytë, pas Portugalisë.
Në mesfushë dhe sulm nuk ka të reja, me përjashtim të Milot Rashicës. Talenti i Vitesse në Holandë do të luajë dy eliminatoret e Kampionatit Europian në grup, ndaj Greqisë dhe Hungarisë, në “Elbasan Arena”, me kuqezinjtë e drejtuar nga Redi Jupi, pastaj do të vihet në dispozicion të De Biazit për miqësoren e 29 marsit, kundër Luksemburgut.
Duke qenë i angazhuar me Shqipëria U21, në listën e kombëtares së madhe mungon edhe Amir Rrahmani.
Milot Rashica do ti bashkohet kombetares se madhe per miqesoren ndaj Luksemburgut
Më poshtë, ja lista e plotë e lojtarëve, që De Biazi ka thirrur për dy miqësoret e muajit mars:
Portier
Etrit Berisha, Alban Hoxha, Orges Shehi
MBROJTES:
Naser Aliji, Arlind Ajeti, Berat Djimshiti, Mergim Mavraj, Lorik Cana, Elseid Hysaj, Ansi Agolli, Frederik Veseli
Mesfushor:
Migjen Basha, Ergys Kace, Ledian Memushaj, Odise Roshi, Herolind Shala, Ermir Lenjani, Taulant Xhaka, Burim Kukeli, Amir Abrashi, Andi Lila.
Sulmues:
Bekim Balaj, Sokol Cikalleshi, Armando Sadiku, Shkelzen Gashi, Milot Rashica (vetëm për Luksemburgun)
