Mësuesja e gjimnazit “Said Najdeni” të Peshkopisë, Fatbardha Miftari është pushuar sërish nga puna pasi u rikthye në detyrë nga Ministria e Arsimit. Mësuesja e anglishtes, e cila u bë objekt mediatik pasi nxënësit e shkollës së Peshkopisë u ngritën në protesta pas transferimit të saj, këtë herë është shkarkuar nga puna me urdhër të drejtoreshës së shkollës.
Vetë Fatbardha Miftari thotë se si arsye për shkarkimin nga puna, drejtoresha i ka përmendur pjesëmarrjen në tubime publike, shkelje të dispozitave të punës dhe shkelje të etikës.
Nxënësit e shkollës “Said Najdeni” në Peshkopi organizuan protesta duke bojkotuar disa ditë mësimin pas lajmit se mësuesja do të transferohej në një fshat ku detyrohej të bënte pesë orë rrugë në ditë. Vetë mësuesja u shfaq krah tyre me rastin e festës së shtatë marsit./Opinion.al
